ඉන්දියාවේ සිට ලන්ඩන් නුවර බලා පියාසර කිරීමට ගුවන්ගත වූ එයාර් ඉන්දියා ගුවන් සේවයට අයත් ඒ.අයි. 171 බෝයිං 787 ඩ්‍රීම්ලයිනර් මගී ගුවන් යානය අනතුරට පත් වූයේ, එහි ප්‍රධාන නියමුවා ලෙස කටයුතු කළ සුමිත් සබර්වාල් යානයේ ඇන්ජින්වලට ඉන්ධන සැපයීම සිදු කරන ස්විච වසන්ධි කිරීම නිසා යැයි විමර්ශනවලින් අනාවරණය වී ඇති බව, ඇමෙරිකාවේ වෝල් ස්ට්‍රීට් ජර්නල් පුවත්පත අනාවරණය කර ඇත.

ගුවන් යානයේ ප්‍රධාන නියමුවා ලෙස කටයුතු කළ සුමිත් සබර්වාල් සහ යානයේ සහාය නියමුවා ලෙස කටයුතු ක්ලීව් කුන්දර් එයාර් ඉන්දියා ගුවන් සේවයේ පළපුදුරු ගුවන් නියමුවන් දෙදෙනෙකි.

සුමිත් සබර්වාල් ඇන්ජින්වලට ඉන්ධන සැපයීම සිදු කරන ස්විච වසන්ධි කර ඇති බව දැක සහාය නියමුවා ලෙස කටයුතු ක්ලීව් කුන්දර් කලකබලයට පත් වී ඒ ගැන ප්‍රධාන නියමුවාගෙන් ප්‍රශ්න කර ඇති බව ගුවන් යානයේ කළු පෙට්ටියේ පටිගත වී ඇති නියමු කුටියේ හඬපට වලින් මේ වනවිට අනාවරණය වී ඇති බව වෝල් ස්ට්‍රීට් ජර්නල් පුවත්පත වැඩි දුරටත් පවසා තිබේ.

ප්‍රධාන නියමු සුමිත් සබර්වාල් එසේ හිතාමතා ඇන්ජින්වලට ඉන්ධන සැපයීම සිදු කරන ස්විච වසන්ධි කළේ නම් ඔහු එසේ කළේ ඇයිදැයි යන්න සෙවීමට ද විමර්ශන ආරම්භ වී ඇත.

ඉන්දීය ගුවන් නියමුවන්ගේ සංගමය, ප්‍රධාන නියමු සුමිත් සබර්වාල්ට එල්ල වන මෙම චෝදනා ප්‍රතික්ෂේක කරමින් පවසා ඇත්තේ, ගුවන් අනතුර සම්බන්ධයෙන් විනිවිදභාවයකින් යුත් විමර්ශනයක් කඩිනමින් පැවැත්විය යුතු බවය.

එයාර් ඉන්දියා ගුවන් යානය, පසුගිය ජූනි 12 වැනිදා කඩා වැටුණේ, ඉන්දියාවේ ගුජරාට ප්‍රාන්තයේ අහමදාබාද් නුවර සර්දාර් වල්ලභබායි පටෙල් ජාත්‍යන්තර ගුවන්තොටුපොළෙන් ගුවන්ගත වී මිනිත්තු කීපයක් ගතවෙද්දීය. 

අනතුරට පත් වෙද්දී යානයේ සිටි මගීන් සහ කාර්ය මණ්ඩල සාමාජිකයන් ගණන 242 කි. යානය එංගලන්තයේ ලන්ඩන් නුවර ගැට්වික් ජාත්‍යන්තර ගුවන්තොටුපොළ බලා යෑමට නියමිතව තිබුණි.

යානයේ සිටි එක් මගියෙක් හාස්කමකින් දිවි ගලවා ගත්තේය.

යානය කඩා වැටුණේ වෛද්‍ය සිසුන්ගේ නේවාසිකාගාරයක් මතටය. බිම සිටි බොහෝ දෙනෙක් ද ජීවිතක්ෂයට පත්වුණු අතර මරණ 260 පසු කළේය. මෙය මෑත කාලයේ සිදුවුණු බිහිසුණු ගුවන් අනතුරක් ලෙස සැලකෙයි.