රුපියල්  පන්කෝටි තිස් හත් ලක්ෂයක් වටිනා රත්තරන් බිස්කට්  71 ක් සහ ස්වර්ණාභරණ  තොගයක් ඝනක යන්ත්‍ර පෙට්ටි තුළ සගවාගෙන  ඩුබායි සිට මෙරටට පැමිණි ශ්‍රී ලාංකිකයෝ දෙදෙනෙක් කටුනායක ජාත්‍යන්තර ගුවන්තොටුපොළේදී   අත්අඩංගුවට ගත් බව රේගු මාධ්‍ය ප්‍රකාශක රේගු නීති අංශයේ අධ්‍යක්ෂක ලෙස්ලි ගාමිණී මහතා කීවේය.

සැකකරුවෝ 58 සහ 41 වියැති කොළඹ දෙමටගොඩ ප්‍රදේශයේ පදිංචිකරුවෝ වෙති.

මොවුහු  ඩුබායි හා ශ්‍රී ලංකාව අතර නිතර නිතර යන එන බව මෙතෙක් කරන ලද පරීක්ෂණ වලින් අනාවරණය වී ඇත.

අත්අඩංගුවට ගනු ලැබු රත්තරන් තොගයේ  මුළු බර කිලෝග්‍රෑම් දහයයි ග්‍රෑම් හත්සිය පනහකි. 

මින් රත්තරන් බිස්කටි 71 හි බර කිලෝග්‍රෑම් 7 ක් වු බවත් ස්වරණාභරණ අතර කර මාල, වළලු, බ්‍රේස්ලට්, මුදු තිබු බව රේගුව කියයි.

මෙම රත්තරන් තොගය ඩුබායි වලදී මිල දී ගෙන ඇති බවට තොරතුරු අනාවරණය වී ඇත.

සැකකරුවෝ ශ්‍රී ලංකන් ගුවන්සේවයට අයත් යු.එල් 226 දරණ ගුවන් යානයෙන් ඊයේ අළුයම ඩුබායි සිට මෙරටට පැමිණ වාහන අමතර කොටස් බවට රේගුවට ප්‍රකාශ කර ඉතා සුක්ෂම ලෙස ගුවන්තොටුපොළෙන් පිටවීමට උත්සහ දරා ඇත.

එම අවස්ථාවේ ගුවන්තොටුපොළ පැමිණීමේ පර්යන්තයේ රාජකාරියේ නියුතුව සිටි  නියෝජ්‍ය රේගු අධිකාරී නිශාන්ත ජයසිංහ, හසන්ත ගුරුගේ සහ සහකාර රේගු අධිකාරී නුවන් අබේනායක යන නිලධාරීන්ට ඇති වු සැකයක් මත මොවුන් පරීක්ෂා කර ඇත.

එහිදි ඝණක යන්ත්‍ර පෙට්ටි තුළ ඉතා සුක්ෂම ලෙෂ සගවා තිබු මෙම රත්තරන් සොයාගෙන ඇත.

මේ පිළිබඳ විමර්ශන කටයුතු ගුවන්තොටුපොළ රේගු අධ්‍යක්ෂක දීපාල් සිරිබද්ධන මහතාගේ උපදෙස් මත නියෝජ්‍ය රේගු අධිකාරී නිශාන්ත ජයසිංහ, හසන්ත ගුරුගේ සහ සහකාර රේගු අධිකාරී නුවන් අබේනායක ඇතුළු රේගු නිලධාරීහු සිදු කරති.