කාල ළඟදීම කාලක්ක්‍රියා කරයි

(ඩයනා උදයංගනී)

කාලේ මත්පැන් බෝතල් තහනම් කිරීමට අනිවාර්යයෙන් පියවර ගන්නා බවත් ඒ සඳහා වන සාකච්ඡා මෙම සතිය තුළ ආරම්භ කරන බවත් පරිසර අමාත්‍ය මහින්ද අමරවීර මහතා පවසයි.

මිලි ලීටර් 180 මත්පැන් බෝතල් නැතහොත් අරක්කු කාලේ බෝතල් විශාල පාරිසරික ගැටලුවක් වී ඇතැයි කී ඇමතිවරයා මේවා භාවිතා කරන්නන් බෝතල් පරිසරයට බැහැර කිරීම නිසා ගැටලු රැසක් මතුවී ඇති බවත් ඇමතිවරයා සඳහන් කළේය.

බෝතල් එකතු කරන්නන් හෝ මත්පැන් නිෂ්පාදන සමාගම් මගින් කාලේ හිස් බෝතල් එකතු කිරීමේ වැඩ පිළිවෙලක් ක්‍රියාත්මක නොකිරීම නිසා ඒවා පරිසරයට බැහැර කෙරෙන බවත්, ඉන් පරිසරයට මෙන්ම බෝතල් කටු පෑගී තුවාල සිදුවීමෙන් ජනතාවට ද ප්‍රශ්න මතුවන බවත් ඇමතිවරයා කීවේය.

සංඛ්‍යාලේඛන අනුව 2018 වසරේ දී මෙරට අලෙවි වී ඇති අරක්කු බෝතල් 20,12,27,181  අතරින්, බෝතල් 10,50,31,169  කාලේ බෝතල් බවත්, ඒ සියල්ල අවසානයේ එක්වී ඇත්තේ පරිසරයට බවත් ඇමති අමරවීර මහතා පැවසීය.

අමාත්‍යවරයා මේ බව පැවසුවේ අනුරාධපුර ථූපාරාම පෙත් මඟ දෙපස රුක්රෝපණය කිරීමේ වැඩ සටහනකට සහභාගි වෙමිනි.

පරිසර අමාත්‍යාංශය විසින් ක්‍රියාත්මක කර ඇති ‘හුස්ම දෙන තුරු’ වැඩ සටහන යටතේ භූ විද්‍යා සමීක්ෂණ හා පතල් කාර්යාංශය මගින් මෙම වැඩසටහන සංවිධානය කර තිබිණි.