කතරගම කිරිවෙහෙර විහාරාධිපති ආචාර්ය අලුත්වැව සෝරත නා හිමියෝ (71) අපවත් වූහ. ඒ හිමියෝ ඌව සරසවියේ කුලපති වරයාය.

ඒ හිමියෝ ටික කළක් රෝගාතුරව සිටියහ.

අපවත් වී වදාළ පොළොම්මාරුවේ රේවත හිමියන්ගේ ශිෂ්‍යකු ලෙස පැවිදි බිමට ඇතුළත් විය.

මාතලේ ශාසනතිලක හිමියන් ඇතුළු සංඝරත්නයෙන් කොළඹ මරදානේ ශ්‍රී ලංකා විද්‍යාලයෙන් බණ දහම් අධ්‍යාපනය ලැබීය.

ශ්‍රී ලංකාවේ බෝධි සංස්කෘතිය මැයෙන් ලියූ ග්‍රන්ථයට ඒ හිමියනට ආචාර්ය උපාධිය හිමි විය.

ඒ හිමියන් විසින් තවත් පොත් රැසක් ලියා ඇත.

තිස්සමහාරාමයේ බෝගහපැලැස්ස මහා විද්‍යාලයයේ ගුරුවරයකු වූ ඒ හිමියෝ විශ්‍රාම යන තුරු කතරගම ජාතික පාසලේ විදුහල්පතිවරයා විය.

මොණරාගල දිස්ත්‍රික් ශාසනාරක්ෂක බල මණ්ඩලයේ ලේඛකාධිකාරී වූ ඒ හිමියෝ රුහුණු මාගම්පත්තුවේ ප්‍රධාන සංඝනායක පදවියද හෙබවූහ.

විශ්‍රාම ගැනීමෙන් පසුව ආචාර්ය සෝරත හිමියෝ ඌව වෙල්ලස්ස විශ්ව විද්‍යාලයයේ කුලපති පදවියට පත් කරනු ලැබූහ.

කිරිවෙහෙර සංවර්ධනය හා පළාතේ අඩු ආදායම් පවුල්වල ළමයින්ගේ අධ්‍යාපනය වෙනුවෙන් ඒ හිමියෝ නොයෙකුත් වැඩ පිළිවෙළ ක්‍රියාත්මක කළහ.