(බී. ජී. චතුරංග)

මහනුවර යාපනය ඒ නවය මාර්ගයේ ගල්කුලම ඉන්ධන පිරවුම්හල ආසන්නයේදී ඉකුත් 25 වැනිදා රාත්‍රි පුද්ගලයකුට වෙඩි තබා බරපතළ තුවාල කර මනුෂ්‍ය ඝාතනයක් කිරීමට තැත් කළැයි කියන සිද්ධියට සම්බන්ධ වෙඩික්කරු මාතර ප්‍රදේශයේදී අත්අඩංගුවට ගත් බව අනුරාධපුර මූලස්ථාන පොලිසිය පවසයි.

මෙලෙස අත්අඩංගුවට පත්ව ඇත්තේ මාතර සාන්ත යෙනියා මාවතේ පදිංචිකරුවකු වන හිටපු යුද හමුදා ෙසබෙළකි.

වෙඩි ප්‍රහාරයට ලක්ව තුවාල ලබා ඇත්තේ, ගල්කුලම සියඹලාගස්වැව ප්‍රදේශයේ " ක්‍රිකට් සුද්දා" නමැති 29 හැවිරිදි පුද්ගලයෙකි.

ඩුබායිහි සැඟව සිටින මත්ද්‍රව්‍ය ජාවාරම්කරුවකු වන 'තම්මිට සුමිත් ' නැමැත්තා මෙම කුලී වෙඩික්කරු යොදා ගෙන තුවාලකරු ඝාතනය කිරීම සැලසුම් කර වෙඩි තැබීම කර ඇති බව පොලිසිය සඳහන් කළේය.

වෙඩි ප්‍රහාරයට ලක්ව බරපතළ තුවාල ලැබූ තැනැත්තා තම්මිට සුද්දා නමැති අයගේ හෙරොයින් මත්ද්‍රව්‍ය ඊෂි කෑෂ් ක්‍රමයට ස්ථානගත කර ඇති අයකු වන අතර මීට දින කීපයකට පෙර හෙරොයින් ග්‍රෑම් 600 ක් සමග පුද්ගලයකු පොලිස් අත්අඩංගුවට පත්වීමේ සිද්ධියක් සම්බන්ධයෙන් ඇති වූ ආරවුලක් දුර දිග යාමෙන් මෙම වෙඩි තැබීම කර ඇති බවට සැක කරන බවද පොලිසි සදහන් කළේය.