2013 වසරේ ජූලි මාසයේ සිට මේ දක්වා කිරිපිටි නියැඳි 1190ක ඩීසීඩී පරීක්ෂාව සිදු කළ බවත්, 2013 වසරේ ජූලි සහ ඔක්තෝබර අතර කාලයේ කිරිපිටිවල සිදු කළ ඩීසීඩී පරීක්ෂාවෙන් එම නියැදිවලින් සියයට 20ක පමණ ඩීසීඩී පැවැති බවත් ශ්‍රී ලංකා කාර්මික තාක්ෂණ   ආයතනයේ අද පැවැති මාධ්‍ය සාකච්ඡාවක දී අනාවරණය විය.

කාර්මික තාක්ෂණ ආයතනය ආයතනය කළ අනාවරණය රටේ බහුතර ජනතාව පිළිගෙන ක්‍රියා කරන බව කිරිපිටි අලෙවියේ පහත වැටීමෙන් පෙන්නුම් කරන බව තාක්ෂණ හා පර්යේෂණ ඇමැති චම්පික රණවක මහතා එම මාධ්‍ය සාකච්ඡාවේ දී කීවේය.

2013 වසරේ කිරිපිටි ටොන් 84000ක් ආනයනය කළත් 2014 මේ දක්වා ආනයනය කළ කිරිපිටි ප්‍රමාණය ටොන් 6000ක් පමණ බවත්, සෞඛ්‍ය අමාත්‍යංශයේ නියමය පරිදි මෙරටට ගෙන්වන සෑම කිරිපිටි තොගයකම ඩීසීඩී පරීක්ෂාව අයිටීඅයි ආයතනයෙන් සිදු කරන බවත් රණවක මහතා පැවසීය.

මේ දක්වා සිදු කළ සියලුම ඩීසීඩී පරීක්ෂාවල වාර්තා නිවැරදි බවට ශ්‍රී ලංකා කාර්මික තාක්ෂණ ආයතනය    මෙන්ම තමන්ද තහවුරු කරන බව කී ඇමැතිවරයා තම අමාත්‍යංශය හෝ ඒ යටතේ ඇති ආයතන සල්ලිවලට යට නොවන බව ද කීවේය.