(සුජිත් හේවාජුලිගේ )

පාර්ලිමේන්තුවට නුදුරු ස්ථානයක උද්ඝෝෂණයක සිටි පිරිසකට කඳුළු ගෑස් ප්‍රහාර එල්ල ඇතුළු සිද්ධීන් සම්බන්ධයෙන් පරීක්ෂණයක් පවත්වා වාර්තාවක් බාර දෙන ලෙස පොලිස්පතිවරයාට අද (9)ලිපියක් යොමු කරන බව කතානායක මහින්ද යාපා අබේවර්ධන මහතා ලංකාදීපයට පැවැසීය.

මේ සිද්ධිය ඇතිවූයේ පසුගිය 6 වැනිදා සිකුරාදා පස්වරුවේය.

සිද්ධියෙන් පසු සමගි ජන බලවේගයේ මන්ත්‍රීවරු පිරිසක් පාර්ලිමේන්තු සභා ගර්භය මැදට පැමිණ මේ සම්බන්ධයෙන් වහා සොයා බලා කටයුතු කරන්නැයි ඉල්ලමින් විරෝධතාවයක යෙදුණහ.

මන්ත්‍රීවරු කිහිප දෙනෙක් වේත්‍රධාරී නරේන්ද්‍ර ප්‍රනාන්දු මහතාට පහරදී සෙංකෝලය පැහැර ගැනීමටද මෙහිදී උත්සාහ දරනු දැක ගත හැකිවිය.

මේ අවස්ථාවේදී කතානායකවරයා විශේෂ ප්‍රකාශයක් කරමින් පැවසුවේ එම සිද්ධිය සම්බන්ධයෙන් පොලිස්පතිවරයාගෙන් වාර්තාවක් කැඳවන බවයි.

රට විශාල අර්බුදයකට මුහුණ දී සිටින හෙයින් ජනතාව මේ අවස්ථාවේදී සාමකාමීව කටයුතු කිරීම ඉතා වැදගත් බව කතානායකවරයා වැඩිදුරටත් සඳහන් කළේ‍ය.