(සුජිත් හේවාජුලිගේ සහ අංජුල මහික වීරරත්න)

කථානායකවරයා ඕස්ට්‍රේලියාවේ ආයෝජකයන්ට ශ්‍රී ලංකාවේ ආයෝජන සඳහා පැමිණෙන ලෙස ආරාධනා කළේය.

ඔහු එසේ ආරාධනා කළේ ශ්‍රී ලංකාවේ ඕස්ට්‍රේලියානු මහ කොමසාරිස් මැතිව් ඩක්වර්ත් මහතා පාර්ලිමේන්තුවේදී හමු වූ අවස්ථාවේදීය.

මහ කොමසාරිස්වරයා සාදරයෙන් පිළිගත් කථානායකතුමා, දෙරට අතර ද්විපාර්ශ්වික සබඳතා ශක්තිමත් කිරීම සඳහා ඕස්ට්‍රේලියාව දීර්ඝකාලීනව ලබා දී ඇති සහයෝගය පිළිබඳව ශ්‍රී ලංකාවේ අවංක කෘතඥතාව පළ කළේය.

විශේෂයෙන්ම, මෑතකදී ඇති වූ 'දිට්වා' සුළි කුණාටුවෙන් සිදු වූ විපතින් අනතුරුව ඕස්ට්‍රේලියාව ඔස්ට්‍රේලියානු ඩොලර් මිලියන 3.5ක් වටිනා මානුෂීය ආධාර ලබා දීම සම්බන්ධයෙන්  කථානායක  විශේෂ කෘතඥතාව පළ කළේය.

ශ්‍රී ලංකාවේ කාර්යක්ෂම ආපදා ප්‍රතිචාර යාන්ත්‍රණය සහ මෙරටට සංචාරකයින්ගේ ආරක්ෂාව පිළිබඳ අඛණ්ඩ සහතිකය තහවුරු කරමින්, සුළි කුණාටුව අතරතුර කිසිදු සංචාරකයෙකුට හානියක් සිදු නොවූ බව  කථානායකතුමා අවධාරණය කළේය.

රජයේ දැනට ක්‍රියාත්මක වන අධ්‍යාපන ප්‍රතිසංස්කරණ හා තරුණයින් සඳහා වෘත්තීය පුහුණු අවස්ථා ශක්තිමත් කිරීම සඳහා ගන්නා පියවර පිළිබඳව ද කථානායකතුමා මෙහිදී අවධානය යොමු කළේය. ප්‍රමුඛ පෙළේ ගෝලීය අධ්‍යාපන කේන්ද්‍රස්ථානයක් ලෙස ඕස්ට්‍රේලියාවේ වැදගත්කම සඳහන් කරමින්, අදාළ පාර්ශ්වකරුවන් සමඟ අධ්‍යාපන ක්ෂේත්‍රයේ සහයෝගීතාව තවදුරටත් වැඩිදියුණු කිරීමේ වැදගත්කම ඔහු අවධාරණය කළේය.

ඕස්ට්‍රේලියානු ආයෝජකයින්ටද  කථානායකවරයා ආරාධනයක් කළ අතර, ආයෝජනය සඳහා ශ්‍රී ලංකාව සාමකාමී සහ හිතකර ගමනාන්තයක් බව අවධාරණය කළේය. ව්‍යාපාර කිරීමේ පහසුව වැඩිදියුණු කිරීම සඳහා රජය  ගෙන ඇති ක්‍රියාමාර්ග පිළිබඳව ද ඔහු පැහැදිලි කළේය. විධිමත් තනි කවුළු පහසුකම් යාන්ත්‍රණයක් (single-window) හඳුන්වා දීම මෙන්ම අල්ලස හා දූෂණයට එරෙහිව සටන් කිරීම සඳහා ගෙන ඇති පියවර ඔහු පෙන්වා දුන්නේය. තවද, ශ්‍රී ලංකා - ඕස්ට්‍රේලියානු පාර්ලිමේන්තු මිත්‍රත්ව සංගමය මඟින් පාර්ලිමේන්තු සම්බන්ධතාවය තවදුරටත් ශක්තිමත් කිරීමේ වැදගත්කමද ඔහු සඳහන් කළ අතර, ජාත්‍යන්තර අවස්ථාවලදී ඕස්ට්‍රේලියාව ලබා දෙන අඛණ්ඩ සහයෝගය පිළිබඳවද කෘතඥතාව පළ කළේය.

මෙහිදී ඕස්ට්‍රේලියානු මහ කොමසාරිස්වරයා පුළුල් පරාසයක ක්ෂේත්‍ර ඔස්සේ ශ්‍රී ලංකාව සමඟ සහයෝගීතාව තවදුරටත් තහවුරු කිරීම සඳහා ඕස්ට්‍රේලියාවේ කැපවීම නැවත තහවුරු කළේය. මෑතකදී ඇති වූ 'දිට්වා' සුළි කුණාටුව ඵලදායී ලෙස කළමනාකරණය කිරීම, විශේෂයෙන් සංචාරකයින්ගේ ආරක්ෂාව සහතික කිරීම පිළිබඳව, ශ්‍රී ලංකා රජය හා ජනතාවට ඔහු ප්‍රශංසා කළේය.

තවද, දැනට ශ්‍රී ලාංකික සිසුන් 20,000ක් පමණ ඕස්ට්‍රේලියාවේ උසස් අධ්‍යාපනය හදාරමින් සිටින බව සඳහන් කළ හෙතෙම  අධ්‍යාපන ක්ෂේත්‍රයේ සහයෝගීතාව තවදුරටත් ශක්තිමත් කිරීම සඳහා ඕස්ට්‍රේලියාවේ අපේක්ෂාව බව  ප්‍රකාශ කළේය.

සංචාරක ක්ෂේත්‍රය සම්බන්ධයෙන් අදහස් දක්වමින්, මෙම වසර තුළ තවත් ඕස්ට්‍රේලියානු සංචාරකයින් වැඩි පිරිසක් ශ්‍රී ලංකාවට පැමිණෙනු ඇතැයි ඔහු විශ්වාසය පළ කළේය. ශ්‍රී ලංකා වෙළඳපොළේ පරිප්පු ඇතුළු ඕස්ට්‍රේලියානු කෘෂිකාර්මික නිෂ්පාදන පවතින බව ඔහු තවදුරටත් පෙන්වාදුන් අතර, විශේෂයෙන්ම කෘෂිකාර්මික අංශයේ ද්විපාර්ශ්වික වෙළඳාම පුළුල් කිරීමේ හැකියාව පිළිබඳවද අවධානය යොමු කළේය.

ශ්‍රී ලංකාව සහ ඕස්ට්‍රේලියාව අතර පවතින කල් පවත්නා සහ මිත්‍රශීලී සබඳතා පිළිබිඹු කරමින්, විවිධ ක්ෂේත්‍ර හරහා සහයෝගිතාව තවදුරටත් ශක්තිමත් කිරීම සඳහා වූ අන්‍යෝන්‍ය කැපවීම දෙපාර්ශ්වය විසින් මෙහිදී නැවත තහවුරු කරන ලදී.