විදුලිය ඇන හිටි අවස්ථාවේ කොළඹ කොටස් වෙළඳපොළ අඳුරේ තැබීම ගැන එහි නිලධාරීන්ගෙන් කරුණු විමසීමට තමා නියෝග කළ බව අගමැති රනිල් වික්‍රමසිංහ මහතා අද (23) පාර්ලිමේන්තුවේදී පැවසීය.

රටේ ආර්ථිකය පිළිබඳ විවාදයේදී මේ අදහස් දැක්වූ අගමැති ප්‍රකාශ කළේ ‘විදුලිය ඇන හිටි අවස්ථාවේ කොළඹ කොටස් වෙළඳපොළත් අඳුරට ගියා. විදුලිය ගියාම පණ ගන්වන විදුලි නිපදවන යන්ත්‍ර කිසිවක් එහි තිබී නැහැ. මේ ගැන කොටස් වෙළඳපොළේ නිලධාරීන් කැඳවා අහන්න මම නියම කර තිබෙනවා‘ යනුවෙනි.

මේ අතර පෞද්ගලික අංශයේ සේවක වැටුප රුපියල් 2500කින් වැඩි කිරීමේ සහ එම සේවකයන්ගේ අවම වැටුප රුපියල් දස දහසක් විය යුතු බව දැක්වෙන පනත් කෙටුම්පත්වලට තම අත්සන යෙදූ බව කතානායක කරු ජයසූරිය මහතා පාර්ලිමේන්තුවේදී අද ප්‍රකාශ කළේය.

පෞද්ගලික සේවක වැටුප් සම්බන්ධ පනත අනුව රුපියල් 40000කට අඩු මාසික වැටුපක් හිමි පෞද්ගලික අංශයේ සෑම සේවකයකු සඳහාම 2015 මැයි මස සිට රුපියල් 1500කින්ද 2016 ජනවාරි සිට රුපියල් දහසකින්ද මාසික වැටුප ඉහළ දැමිය යුතුය.