ජාතික ආරක්ෂාවට තර්ජනයක් වන අන්දමේ දුරකතන ඇමතුම් කිහිපයක් ලැබීම නිසා කටුනායක ගුවන් තොටුපොළේ ආරක්ෂාව තර කර ඇති බව ආරක්ෂක ලේකම් කරුණාසේන හෙට්ටිආරච්චි මහතා පැවසීය.

ජාත්‍යන්තර ත්‍රස්තවාදීන්ගේ තර්ජනයක් ඇති වෙතැයි සැකයක් මත ත්‍රිවිධ හමුදා සහ පොලිස් සාමාජිකයන්, බුද්ධි අංශ නිලධාරීන් මේ සඳහා යෙදූ බව ද ඔහු කීවේය.

එවැනි ඇමතුම් ලැබුණ බවට බුද්ධි අංශ තමන් දැනුම්වත් කර ඇති බව ද ආරක්ෂක අමාත්‍යංශයේ අද පැවැති මාධ්‍ය හමුවක දී ඔහු පැවසීය.

ජාත්‍යන්තර ත්‍රස්තවාදී කණ්ඩායම්වල ක්‍රියාකාරීත්ව සම්බන්ධයෙන් ජනාධිපතිවරයාගේ උපදෙස් පරිදි ඉකුත් දෙසැම්බරයේ සිට ගුවන්තොටුපොළ බලධාරීන්, සිවිල් ගුවන් සේවා අධිකාරිය, රේගුව ඇතුළු ආයතන එක්ව සාකච්ඡා පවත්වා මෙම තීරණය ගෙන ඇති බව ද හෙතෙම කීවේය.