ඕස්ට්‍රේලියාවේ බොන්ඩි වෙරළේ රැඳී සිටි පුද්ගලයින් ඉවත් කර එම ස්ථානය ජන ශුන්‍ය කිරීමට එරට බලධාරින් පියවර ගෙන ඇත.

සෙල්සියස් අංශක 35 ක පමණ උෂ්ණත්වයක් ඊයේ දිනයේදී සිඩ්නි නුවර ඇතැම් ප්‍රදේශවලින් වාර්තා වූ බැවින් බොන්ඩි වෙරළට ද වැඩි පිරිසක් ඒකරාශී වී තිබුණි.

කෙසේ වෙතත් කොරෝනා වෛරසයේ පැතිරීම හේතුවෙන් ඕස්ට්‍රේලියා රජය පනවා ඇති සීමා හමුවේ එය ජාත්‍යන්තර වශයෙන් විවේචනයට ලක්විය.

ඒ අනුව වෙරළට අද දිනයේත් විශාල පිරිසක් එක්රැස් වීම හේතුවෙන් එය ජන ශුන්‍ය කිරීමට පියවර ගැනුණි. ඊට අමතරව සිඩ්නි නගරයේ තවත් ප්‍රසිද්ධ වෙරළ කිහිපයක්ම මෙසේ ජන ශුන්‍ය කලාප බවට පත් කිරීමට පියවර ගෙන ඇත.

පුද්ගලයින් 500 කට වඩා එක්රැස් වීම ද ඕස්ට්‍රේලියාව තුළ සතියකට වැඩි කාලයක් සඳහා තහනම් කර තිබේ.

“අපි විනෝදයට වැට බඳින පොලිසියක් නෙමේ. අපි මේක කරන්නේ ජීවිත බේරා ගන්නයි“ යයි නිව් සවුත් වේල්ස් ප්‍රාන්ත රාජ්‍යයේ පොලිස් කටයුතු ඇමති ඩේවිඩ් එළියට් මහතා පැවසීය.

ඕස්ට්‍රේලියාවේ සිටින කොරෝනා වයිරසය ආසාදිත  සංඛ්‍යාව අද (සෙනසුරාදා) වන විට 1068 දක්වා ඉහළ ගොස් තිබිණ. ඔවුන් අතුරින් 10 දෙනෙක් ඇමරිකානු ජාතිකයෝ වෙති.

226