සිරුරේ ප්‍රතිශක්තිය අඩපණ කරන ‘කොවිඩ් 19’ උප ප්‍රභේද දෙකක් සම්බන්ධයෙන් ලෝක සෞඛ්‍ය සංවිධානය විමසිල්ලෙන් පසුවන බව විදෙස් මාධ්‍ය වාර්තා කරයි. විද්‍යාඥයන් මෙම නව ප්‍රභේද නම් කර ඇත්තේ ‘බී.ඒ.4’ සහ ‘බී.ඒ.5’ යනුවෙනි.

‘බී.ඒ.4’ සහ ‘බී.ඒ.5’ ඔමික්‍රෝන් උප ප්‍රභේද සිරුරේ ප්‍රතිශක්තිය අඩපණ කරන බවත්, කොරෝනා එන්නත්වලට පවා ප්‍රතිරෝධයක් දක්වන බවත් ලෝක සෞඛ්‍ය සංවිධානයට පෙන්ව දී ඇත්තේ දකුණු අප්‍රිකාව වයිරස විශේෂඥයන්ය.

‘ඔමික්‍රෝන්’ ප්‍රභේදයට පළමුවෙන් හඳුනා ගනිමින් ඒ බව ලොවට ප්‍රසිද්ධ කළේ ද දකුණු අප්‍රිකා විද්‍යාඥයන්ය. ලොව ප්‍රමුඛ පෙළේ වයිරස පර්යේෂණ ආයතන ඇත්තේ ද දකුණු අප්‍රිකාවේය.

මේ වනවිට දකුණු අප්‍රිකාව පස්වැනි කොරොනා රැල්ලෙන් පීඩා විඳින බව පැවැසෙයි.

පළමු ඔමික්‍රොන් විකෘතිය, ‘බී.ඒ.1’, ‘බී.ඒ.2’ සහ ‘බී.ඒ.3’ ආදී වශයෙන් බෙදී වෙන්වී ගොස් ඇති අතර, මෙම උප ප්‍රභේද තුනට වඩා අලුතින් හඳුනා ගැණුනු ‘බී.ඒ.4’ සහ ‘බී.ඒ.5’ උප ප්‍රභේද බිහිසුණු බවත්, එය යළිත් වරක් ලොව පුරා කොරෝනා වසංගත රැල්ලක් ඇති කිරීමට හේතුවක් වීමට ඉඩ ඇති බවත් දකුණු අප්‍රිකා වයිරස විශේෂඥයන් ලෝක සෞඛ්‍ය සංවිධානයට පැහැදිලි කර තිබේ.

ලෝක සෞඛ්‍ය සංවිධානය ‘බී.ඒ.4’ සහ ‘බී.ඒ.5’ උප ප්‍රභේද ගැන විමසිල්ලෙන් පසුවන්නේ එබැවිනි.

(රොයිටර්)