(මනෝප්‍රිය ගුණසේකර)

එක්ස්ප්‍රස් පර්ල් නෞකාව ශ්‍රී ලංකා වෙරළේ ගිනි ගැනීමෙන් හානිකර ද්‍රව්‍ය දේශිය ජලතීරයට මුසුකරන ලදැයි චෝදනා කරමින් නෞකාවේ කපිතාන්වරයාට සහ දේශීය නියෝජිතයන්ට එරෙහිව පවරා ඇති නඩුවේ විභාගය අවලංගු කළ කොළඹ මහාධිකරණ විනිසුරු දමිත් තොටවත්ත මහතා ලබන 23 වැනිදා නඩුව යළි කැඳවීමට නියම කළේය.

නඩුව ලබන 12 වැනිදා සිට විභාගයට ගැනීමට මීට පෙර නියම කර තිබුණත් අභියාචනාධිකරණයට ඉදිරිපත් කර ඇති ඇපෑල විභාග කොට අවසන් වනතුරු මෙම නඩු විභාගය ආරම්භ නොකරන බවට පැමිණිල්ල දැනුම් දී ඇති බවට ඉදිරිපත් වු කරුණු අනුව විනිසුරුවරයා එලෙස තීරණය කළේය.

2021 මැයි මස 19 වැනිදාත් ජුනි මස 02 වැනිදාත් අතර කාලයේ ශ්‍රී ලංකාවට අයත් දේශිය මුහුදේදී ගිනි ගැනීමෙන් නැවේ තිබු හානිකර ද්‍රව්‍ය දේශිය ජලතීරයට මුසුකරන ලදැයි සමුද්‍ර දුෂණ වැලැක්වීමේ අධිකාරී පනත යටතේ විත්තිකරුවන්ට එරෙහිව චෝදනා 08ක් මත නීතීපතිවරයා විසින් නඩු පවරා ඇත.

මෙලෙස චෝදනා ලැබ සිටින්නේ නෞකාවේ කපිතාන්වරයා වශයෙන් කටයුතු කළ ටික්ටිකාලෝ විමලි නෞකාවේ දේශීය නියෝජිත සමාගම වන සී කොන්සෝටියම් ලංකා සමාගම” එහි අධ්‍යක්‍ෂවරුන් වන අර්ජුන ඉන්ද්‍රජිත් තිසේරා හෙට්ටිආරච්චි” දේවින්ද ඉන්ද්‍රජිත් තිසේරා හෙට්ටිආරච්චි” මිලින්ද ඉන්ද්‍රජිත් තිසේරා හෙට්ටිආරච්චි” අමින්ද ඉන්ද්‍රජිත් තිසේරා හෙට්ටිආරච්චි” පණ්ඩුක වීරසේකර සහ සංජීව ලක්ප්‍රිය සමරනායක නමැති මහත්වරුන්ය

නඩුව කැඳවනු ලැබු අවස්ථාවේදී මහාධිකරණ විනිසුරු දමිත් තොටවත්ත මහතා අධිකරණය අමතමින් මෙම නඩුව පවරා පවත්වාගෙන යාමට නොහැකි බවට විත්ති පාර්ශවයෙන් ඉදිරිපත් කළ මූලික විරෝධතාවය ප්‍රතික්ෂේප කරමින් දුන් තීන්දුවට එරෙහිව විත්ති පාර්ශවය අභියාචනාධිකරණයට ඇපෑලක් ඉදිරිපත් කර ඇතැයි සඳහන් කළේය.

එම ඇපෑල කැඳවනු ලැබු අවස්ථාවේදී ඇපෑල විභාග කොට අවසන් වනතුරු මෙම නඩු විභාගය ආරම්භ නොකරන බවට පැමිණිලි පාර්ශවය අභියාචනාධිකරණට දැනුම් දී ඇතැයි සඳහන් කළ විනිසුරුවරයා එම තත්වය මත නඩුව විභාග කිරීමට නියම කර තිබූ දිනය අවලංගු කරන බවද දැනුම් දුන්නේය.