(විමුක්ති එස් රුද්‍රිගු)

තායිලන්තයට ගිය ‘‘මුතු රාජා හෙවත් ‘‘සක් සුරින්‘‘ ඇත් ගොව්වන් කැටුව ලම්පාන්ග් පළාතේ අලි ඇතුන් රැක බලා ගන්නා මධ්‍යස්ථානය වෙත ගිය ගමනේදී විනාඩි 5 - 10 කට වරක් කෑම ඉල්ලා හඬා වැටුණු බව තායිලන්ත මාධ්‍ය වාර්තා කර තිබේ.

ඇත් ගොව්වන් සක් සුරින්ට කෙසෙල් බොඩ, උක් ගස් සහ තණකොළ ලබා දෙන විට හඬා වැටීම නවත්වා ඒවා ආහාරයට ගත් බව තායිලන්ත මාධ්‍යවේදීන් පවසා ඇත.

සක් සුරින්ව සෙවණ තිබෙන සුළං හමන ගස්වලින් වටවූ ස්ථානයක රඳවා සිටින බවත් එම ස්ථානයට පුරුදු කිරීම සඳහා සක් සුරින්ගේ පාදයක් ලණුවකින් ගැට ගසා තිබෙන බවත් තායිලන්ත මාධ්‍ය වාර්තා කර ඇත.

ලේ පරීක්ෂණ කිහිපයක් මේ වන විට සිදු කර ඇති බවත් ඒවායේ වාර්තා තවත් දවස් කිහිපයකින් ලැබෙනු ඇති බවත් එම මධ්‍යස්ථානය භාර වෛද්‍යවරයා ප්‍රකාශ කර තිබේ.

දින 30 ක නිරෝධායන කාලයකින් පසුව ජනතාවට සක් සුරින් මුණ ගැසිය හැකි බව එම මධ්‍යස්ථානයේ නිලධාරීන් පවසා ඇත.