මව්පියන් පිරිසක් සමග මීගහතැන්න ප්‍රාථමිකයට බලෙන් ඇතුළුවී දරුවන් 10 දෙනකු බලහත්කාරයෙන් ඇතුළු කළැයි කියන සිද්ධීය සම්බන්ධයෙන් නියෝජ්‍ය ඇමැති පාලිත තෙවරප්පෙරුම කොළඹ පෞද්ගලික රෝහලක ප්‍රතිකාර ලබමින් සිට පොලිසියට බාරවීම සඳහා මීගහතැන්න බලා යමින් සිටි බව පොලිස් ආරංචි කියයි.

ඔහු මේ පියවර ගෙන ඇත්තේ එම පාසලට බලෙන් ඇතුළුවී යැයි කියන කාන්තාවන් 9 දෙනකු මීගහතැන්න පොලිසියෙන් අද අත්අඩංගුවට ගැනීමත් සමගය.

සුදුසුකම් නොලැබූ බව කියන මෙම දරුවන් බලයෙන් පාසලට ඇතුළු කිරීමට මුල්වූ බව කියන තෙවරප්පෙරුම විදුහල්පතිටද පහරදී සියදිවි නසාගැනීමේ රඟපෑමක යෙදුණු බව කියති. ඔහු අත්අඩංගුවට ගෙන නීතිය ක්‍රියාත්මක කරන්නැයි ශ්‍රී ලංකා නීතිඥ සංගමය ද නිවේදනයක් නිකුත් කරමින් කියා සිටියේය.

විදුහල්පතිවරු හා ගුරුවරු සිය ගණනක් පෙරදින මතුගම අධ්‍යාපන කාර්යාලය අසල උද්ඝෝෂණයක් කරමින් කියා සිටියේ ඔහු අත්අඩංගුවට ගන්නා ලෙසයි.

තමා පොලිසියට බාරවන බව තෙවරප්පෙරුම මහතා කියයි. මීගහතැන්න පාසලට තමාත් මවුපියනුත් බලෙන් ඇතුළු නොවූ බව ඔහු කියයි.

‘අපි එහේ යද්දී පොලිසියේ ඕඅයිසී මහත්තයාත් හිටියා. බලෙන් එහි ගියේ නෑ. දරුවන් පාසලට ඇතුළු කරගත්තේ විදුහල්පතිගේ කැමැත්තෙන්. අද මම පොලිසියට බාර වෙනවා. දොස්තරලා එපා කිව්වත් බලෙන් ටිකට් කපාගෙන යනවා.‘