තරුණ පරපුර අතර වඩාත් කතාබහට ලක්වූ යොවුන් ගායකයෙකු වන උදය ශ්‍රී වික්‍රමසිංහ මෑත කාලයේ ක්ෂේත්‍රය තුළ වඩාත් කතා බහට ලක්වූ අයෙකි. සංගීත අධ්‍යක්ෂවරයෙකු ලෙසද මේ වනවිට නමක් දිනාගෙන ඇති ඔහු මේ වනවිට ඒ සම්බන්ධව ඇකඩමියක්ද පවත්වාගෙන යමින් සිටියි. උදය විසින් පසුගියදා ඉංග්‍රීසි ගීතයක්ද එළිදක්වනු ලැබූ අතර ඒ සම්බන්ධව "සාරවිට" අපිට ඔහු මෙසේ පවසා සිටියා.

"මම ක්ෂේත්‍රයට පිවිසියෙත් ඉංග්‍රීසි ගීත හරහායි. නමුත් පසුකාලීනව සිංහල ගීතවලට වැඩිපුර අවධානයක් යොමු කළ නිසා ඉංග්‍රීසි ගීත ගායනයට මම දුන්නේ අඩු තැනක්. ක්ෂේත්‍රයට ඇවිල්ලත් දැන් මම කාලයක් වෙන හින්දා වෙනසකටත් එක්ක ඉංග්‍රීසි ගීතයක් මගේ ආදරණීය රසික, රසිකාවියන්ට ලබාදෙන්න තීරණය කළා. "SUPER NATURAL" නමින් තමයි මේ ගීතය මම මේ වනවිට එළිදක්වලා තියෙන්නේ. ලංකාවේ තියෙන ඉංග්‍රීසි එෆ්.එම් ගුවන් විදුල් නාළිකා බොහෝමයක මේ ගීතය ප්‍රචාරය වෙනවා. දැනට මේ ගීතයට විෂුවල් එකකුත් කරලා තියෙනවා. නමුත්, මම සැලසුම් කරලා තියෙනවා මේ ගීතයට වෙනස්ම ආකාරයෙන් බටහිර ශෛලියට අනුගත අලුත්ම වීඩියෝවක් නිර්මාණය කරන්නත්. එය ඉතා ඉක්මණින්ම සිදුකරන්න මගේ  HEAVEN Studios Productions ආයතනය හරහා බලාපොරොත්තු වෙනවා."