(යොහාන් භාසුර) ආසියානු කුසලාන එක්දින ක්‍රිකට් තරගාවලියේ (2023) ශූරතා දිනාගැනීමට ඉන්දීය ක්‍රීඩකයෝ අද (17) සමත් වූහ. ඉන්දියාව ආසියානු කුසලාන ක්‍රිකට් ශූරතාව දිනූ 8 වැනි අවස්ථාව මෙය වේ. කොළඹ ආර්. ප්‍රේමදාස ක්‍රීඩාංගණයේදී අද පැවැති අවසන් මහ තරගයේදී ඉන්දීය ක්‍රීඩකයෝ කඩුලු 10 කින් ආසන්නතම ශූරයන් වූ සත්කාරක ශ්‍රී ලංකා පිල පරාජය කරමින් පහසු ජයක් ලැබීමට සමත් වූහ. ඉන්දීය පිල ලකුණු 51 ක ජයග්‍රාහි ඉලක්කය ඕවර 6.1 කදී කිසිවකු නොදැවී සම්පූර්ණ කළේය. ඉන්දීය පන්දු යවන්නෝ පළමුව පන්දුවට පහර දුන් ශ්‍රී ලංකා පිල ඕවර 15.2 කදී ලකුණු 50 කට සීමා කළහ. මෙය ශ්‍රී ලංකා ක්‍රිකට් ඉතිහාසයේ එක්දින තරගයකදී දැවී ගිය දෙවැනි අඩුම ලකුණු සංඛ්‍යාව ද වේ. කුසල් මෙන්ඩිස් ලකුණු 17 ක් රැස්කරමින් ඉනිම ඉහළතම ලකුණු ලාභියා බවට පත්වූ අතර ශ්‍රී ලංකා පිතිකරුවන් නවයකට ඉලක්කම් දෙකේ සීමාවට ඒමට නොහැකිවීම කැපී පෙනුණි. දකුණතින් වේග පන්දු යවන මොහොමඩ් සිරාජ්, ශ්‍රී ලංකා ඉනිමේ විනාශකරු බවට පත්වෙමින් ලකුණු 21 කට කඩුලු 6 ක් දවාගැනීමට සමත් විය. ශ්‍රී ලංකා පිලේ නායක දසුන් ශානක කාසියේ වාසිය ලබා පළමුව පන්දුවට පහර දීමට තීරණය කළේය. ශ්‍රී ලංකා පිල ඕවර 15.2 කද සියලු දෙනා දැවී 50 (කුසල් මෙන්ඩිස් 17, දුෂාන් හේමන්ත 13, මොහොමඩ් සිරාජ් 21/6, හර්ද්‍රික් පාණ්ඩියා 3/3) ඉන්දීය පිල ඕවර 6.1 කදී කිසිවකු නොදැවී 51 (ඉෂාන් ක්‍රිෂන් නොදැවී 23, ෂුබ්මන් ගිල් නොදැවී 27)