විදේශ අමාත්‍ය මංගල සමරවීර මහතා සහ ශ්‍රී ලංකා  චීන තානාපති ෂි ෂියෑන්ග් ලියෑන්ග් මහතා අතර විශේෂ හමුවක් මේ සතියේදී පැවැත්වෙනු ඇතැයි විදේශ කටයුතු අමාත්‍යාංශ ආරංචි පවසයි.

චීනය ශ්‍රී ලංකාවට ලබා දෙන ණය මුදල් වල පොලී අනුපාතය සම්බන්ධයෙන් මෙරට මුදල් ඇමතිවරයා සහ චීන තානාපතිවරයා විසින් මාධ්‍ය හමුවන් දෙකකදී  සිදු කළ ප‍්‍රකාශයන් සම්බන්ධයෙන් ඇති තත්ත්වය පිළිබඳව සාකච්ඡා කිරීමට මෙම හමුව පැවැත්වේ.

එම ප‍්‍රකාශයන් පිළිබද චීන තානාපතිවරයා ගෙන් නිසි තොරතුරු විමසීමක් කර ඇති වී තිබෙන ගැටලූකාරී තත්ත්වය විසඳීමට  විදේශ අමාත්‍යවරයා එහිදී කටයුතු කිරීමට නියමිතය.

මුදල් ඇමතිවරයා විසින් ඉකුත් අඟහරුවාදා පැවති මාධ්‍ය හමුවකදී චීනය විසින් ශ්‍රී ලංකාවට ලබා දෙන ණය මුදල් වල පොලී අනුපාතය මිළ අධික බව ප‍්‍රකාශ කළ අතර චීන තානාපතිවරයා ද කොළඹ පිහිටි ශ්‍රී ලංකා තානාපති කාර්යාලයේ පැවති මාධ්‍ය හමුවකදී ඊට පිළිතුරු වශයෙන් චීනයේ ණය පොළි අනුපාතය වැඩිනම් තවදුරටත් ශ්‍රී ලංකාව චීනයෙන් ණය ඉල්ලා සිටින්නේ කුමන හේතුවක් නිසා දැයි විමසා සිටියේය.

ඉකුත් බ‍්‍රහස්පතින්දා මහනුවරදී මාධ්‍යවේදීන් පිරිසක් චීන තානාපතිවරයා කළ එම ප‍්‍රකාශය සම්බන්ධයෙන් මුදල් ඇමතිවරයාගෙන් යළිත් විමසීමකදී ඔහු කියා සිටියේ තමන් ශ්‍රී ලංකාවේ මුදල් ඇමතිවරයා මිසක් චීනයේ මුදල් ඇමතිවරයා නොවන බවය.

මේ අතර ඇතිවූ මෙම තත්ත්වයත් සමඟ මුදල් ඇමතිවරයා ද චීන තානාපතිවරයා සම්බන්ධයෙන් විදේශ අමාත්‍යවරයාට පැමිණිල්ලක් කර ඇතැයි එම අමාතයාංශ ආරංචි කියයි.

මේ අතර චීන තානාපතිවරයාද ඉකුත් කාලයේදී එම ධූරයට නොගැළපෙන ආකරයෙන් කටයුතු කර ඇතැයි යන්න රජයේ පාර්ශවයන් ගෙන චෝදනා එල්ල වෙමින් පවතින්නේ යැයිද වාර්තාවේ.