පසුගිය වසරේ හා මේ වසර මුලදී බොලිවුඩයේ ජනප්‍රියතම පෙම් යුවළ බවට පත් වූ ආලියා භාට් හා සිද්ධාර්ත් මල්හෝත්‍රා මේ වනවිට විරසක වී ඇති පුවතක් බොලිවුඩ් පුරයෙන් වාර්තා වේ. මොවුන් දෙදෙනාගේ වෙන්වීමට හේතුව දැනට නිශ්චිතව අනාවරණය නොවන අතර, 'ලයිෆ් ඔෆ් බොලිවුඩ්' අඩවිය සඳහන් කරන්නේ පෞද්ගලික හේතුවක් මත මොවුන් දෙදෙනා මෙසේ වෙන්වීමට හේතුවී ඇති බවය. මොවුන් දෙදෙනාගේ වෙන්වීම නිසාවෙන් ඉදිරියේදී රූපගත කිරීමට සැලසුම් කර තිබූ 'ආෂික්‍යු' තුන්වැනි චිත්‍රපටයේ නිෂ්පාදක භූෂන් කුමාර් දැඩි අර්බුදයකට මුහුණ පා තිබෙන බව මෙම වෙබ් අඩවිය වැඩිදුරටත් සඳහන් කර සිටියි.

ආලියා හා සිද්ධාර්ත් දෙදෙනාගේ විරසකවීම හරහා සිය චිත්‍රපටයේ වැඩ කටයුතු අතරමග ඇනහිටිදෝ සැකයකින් ඔහු සිටින බවත්, තවමත් සිද්ධාර්ත් මෙන්ම ආලියාද මෙම චිත්‍රපටය එක් නොවීමට තීරණයක් ගෙන නොමැති හෙයින් වෙනත් නළුනිළියක් මෙම චිත්‍රපටයට සම්බන්ධ කර ගැනීමට නොහැකිව ප්‍රශ්න රැසකටද මුහුණ දී සිටින බවත් වාර්තා වේ. කෙසේ වෙතත්, 'ආෂික්‍යූ' අලුත් චිත්‍රපටය සඳහා සිද්ධාර්ත් මෙන්ම ආලියාද ගිවිසුම් අත්සන් කර නොමැති බවටද ඉන්දීය සිනමා පුවත්පත් කිහිපයක් වාර්තා කර තිබෙන බවටද තොරතුරු ලැබී තිබේ.