වංචා හා දූෂණ සම්බන්ධයෙන් විභාග කිරීමේ යාන්ත්‍රණය ශක්තිමත් කිරීමට ප්‍රධාන වංචා, මූල්‍ය අපරාධ හා දූෂණය පිළිබඳ ලේකම් කාර්යාලයක් පිහිටුවන බව අගමැති රනිල් වික්‍රමසිංහ මහතා පැවසීය. අගමැතිවරයා ඒ බව පැවසූවේ හිරු ටීවී නාලිකාව සමග සම්මුඛ සාකච්ඡාවකට එක්වෙමිනි.

මැතිවරණ වේදිකාවේ පොරොන්දුවූ පරිදි වංචා දූෂණ සිදුකළ දූෂිතයන්ට දඬුවම් දීම පිළිබඳව මේ වන විට ජනතාවට මතුවී ඇති ප්‍රශ්නාර්ථය පිළිබඳව වැඩසටහන මෙහෙයවූ සුදේව හෙට්ටිආරච්චි මහතා සිදුකළ විමසුමකට පිළිතුරු වශයෙන් වික්‍රමසිංහ මහතා ඒ බව කීවේය.

මූල්‍ය කටයුතු ගැන පසුබිමක් තිබෙන ගණකාධිකාරිවරුන් මේ කාර්යාලයට අවශ්‍ය බවත් ඒ සඳහා කටයුතු අරඹා ඇතැයිද අගමැතිවරයා කීවේය. මංගල සමරවීර අමාත්‍යවරයාගේ ඇමෙරිකානු සංචාරයේදී මෙරට දූෂණ වංචා සෙවීමට ඇමරිකා ආණ්ඩුවේ අධිකරණ දෙපාර්තමේන්තුවේ ආධාර ඉල්ලූ බවද ඒ මහතා පැවසීය.

ලොව ඩොලර් නෝට්ටු ගනුදෙනු සියල්ලම නිව්යෝර්ක් නුවර මූලික කරගෙන සිදුවන බැවින් ලෝක බැංකුවේ දූෂණ අංශය මුණ ගැසී සාකච්ඡා කළ බවද  එළැඹෙන සතියේදී විජයදාස රාජපක්ෂ මහතා එංගලන්තයට ගිය පසු ප්‍රධාන වංචා කාර්යාලයෙත් සහයෝගය ඉල්ලා සිටින බවත් අගමැතිවරයා සඳහන් කළේය.

මහ බැංකු අධිපතිවරයා ඉන්දීය මහ බැංකු අධිපතිවරයාගෙන්ද මේ සඳහා සහාය ඉල්ලමින් ලිපියක් යවා ඇතැයිද වික්‍රමසිංහ මහතා එහිදී අනාවරණය කළේය.