නිදහස ලබා 68 වසරක් ගත වුවද ජාතියක් ලෙස දිනාගත යුතු තවත් බොහෝ දේ ලාංකිකයන් හමුවේ ඉතිරිව ඇතැයි ජාතික නිදහස් දිනය නිමිත්තෙන් පණිවිඩයක් නිකුත් කරමින් ගලගම අත්ථදස්සි අස්ගිරි මහ නාහිමියෝ කියති.

අතීත විරුවන්ගේ චරිත උදාහරණයට ගනිමින් මවුබිමේ යහපත උදෙසා සියලු දෙනා ධෛර්යමත්ව ක්‍රියා කළ යුතු බව ද අස්ගිරි නාහිමියෝ පවසති.

මේ අතර තිබ්බටුවාවේ සුමංගල මල්වතු මහනාහිමියෝ නිදහස් දින පණිවිඩයෙන් කියනුයේ නව පාලනය යටතේ උදාවී ඇති ස්වර්ණමය අවස්ථාවෙන් ප්‍රයෝජන ගෙන ජාති, ආගම් හෝ පක්ෂ භේද නොසලකා ජාතික අපේක්ෂාවන් ඉටුකර ගැනීමට සියලු දෙනා එක්සිත්ව, එක්සත්ව කටයුතු කළ යුතු බවයි.

දිනාගත් නිදහස අර්ථවත් කිරීමට රට ගොඩනැගීමේ කාර්ය අවංකව ඉටු කිරීමට අවැසි ශක්තිය සහ වරප්‍රසාද සියලු දෙනාට ලබාදෙන්නැයි දෙවියන්ට යාඥා කරන බව කොළඹ අගරදගුරු මැල්කම් කාදිනල් රංජිත් හිමිපාණන් නිදහස් දින පණිවිඩයෙන් කියයි.

සෞභාග්‍යමත් දේශයක් ගොඩනැගීමට ඉවසිල්ලෙන් හා සාමකාමීව කටයුතු කළ යුතු බව සමස්ත ලංකා ජමියතුල් උලමා සංවිධානය නිදහස් දින පණිවිඩයෙන් පවසයි.