අස්ගිරි මහාවිහාර පාර්ශවය සදහා අනුනායක හිමිනමක් තෝරා පත් ගැනිම දින නියමයක් නොමැතිව කල් දැමිමට අස්ගිරි පාර්ශවිය විංසත් වර්ගික කාරක සංඝ සභාව අද (27) තිරණය කළේය.

වරකාගොඩ ඥානරතන අස්ගිරි මහානායක හිමි ප්‍රමුඛ විංසත් වර්ගික කාරක සංඝ සභාව පස්වරු 3 ට මංගල උපෝසථාගාරයේදී රැස්වූ අතර  වෙසක් මස ළඟා වන බැවින් අස්ගිරි මහා විහාරය සතුව විශාල කාර්යභාරයක් ඇති බවත් අස්ගිරි මහානායක හිමියන් හට අක්තපත්‍ර ප්‍රධානය කිරිමේ රාජ්‍ය උත්සවය මැයි 17 වැනිදා පැවැත්වෙන බැවින් ඒ සදහා අවශ්‍ය කටයුතු සාකච්ඡා කළ බවත් අස්ගිරි පාර්ශවයේ ලේඛකාධිකාරී  ආනමඩුවේ ධම්මදස්සි  හිමියෝ කීහ.

අනුනායක පදවිය පත්කිරිම මසක් හෝ දෙකක් කල් යා හැකි බවත් හෙළ රජ දවස සිට පැවැත්වෙන උපසම්පදා පුණ්‍ය කර්ම කටයුතු පැවැත්විය යුතු බැවින් අනුනායක පදවිය පත්කිරිම කල් දැමු බවත් ධම්මදස්සි  හිමියන් පැවසුහ.

අනුනායක පදවිය සදහා අපේක්ෂාවෙන් අස්ගිරි පාර්ශවයේ ලේඛකාධිකාරී  ආනමඩුවේ ධම්මදස්සි  සහ මහියංගණ රජමහා විහාරාධිපති උරුලෑවත්තේ ධම්මරක්ඛිත යන හිමිවරු ඉදිරිපත් වි සිටියහ.