(කුරුණෑගල අධිකරණ වාර්තාකරු)

පොල්ගහවෙල කෑගල්ල මාර්ගයේ පොලිසගහවෙල නගරයට ආසන්න ප්‍රදේශයේ මාර්ග සංවර්ධන අධිකාරියට අයත් භූමියක පිහිටි අනවසර ඉදිකිරීමක් සම්බන්ධයෙන් නීතිය ක්‍රියාත්මක නොකිරීමට ව්‍යාපාරිකයකුගෙන් රුපියල් 120,000ක අල්ලස් මුදලක් ලබා ගත් කුරුණෑගල මාර්ග සංවර්ධන අධිකාරියේ නිලධාරියකු ලබන සැප්තැම්බර් මස පළමුවැනි දා තෙක් රිමාන්ඩ් බාරයේ තැබීමට කුරුණෑගල ප්‍රධාන මහේස්ත්‍රාත් බන්ධුල ගුණරත්න මහතා අද නියෝග කළේය.

මෙලෙස රක්ෂිත භාරයට පත් කෙරුණේ  බී.එම්. ඉන්ද්‍රපද්ම දිසානායක නමැති කුරුණෑගල පිහිටි මාර්ග සංවර්ධන අධිකාරි වයඹ පළාත් ඉංජිනේරු කාර්යාලයේ ලිපිකරුවෙකි.

පොල්ගහවෙල නගරයට යාබද කෑගල්ල පාරේ ඉදිකර තිබෙන ගොඩනැගිල්ලක ඉදිරි කොටස මාර්ග සංවර්ධන අධිකාරියට අයත් කොටසක පිහිටි බැවින් එය ඉවත් කර ගන්නා ලෙස වසර දෙකකට පමණ පෙර සිට ව්‍යාපාරිකයකු වෙත දැනුම් දී තිබේ.

අදාළ ඉදිකිරීම ඉවත් කිරීම එකී ව්‍යාපාරිකයා පැහැර හැර තිබෙන අතර, මෑතක දී යළිත් එම සිද්ධිය කරළියට පැමිණ තිබෙන අතර, මාර්ග සංවර්ධන අධිකාරිය මගින් එයට නීතිමය පියවර ගන්නා බවට ද ව්‍යාපාරිකයා වෙත දැනුම් දී ඇත.

මෙම ගොඩනැගිල්ල බේරා ගැනීමට අදාළ ව්‍යාපාරිකයා බොහෝ උත්සාහ ගෙන ඇති අතර, එහි දී එම විෂය භාරව මින් පෙර කටයුතු කළ බව කියන අත්අඩංගුවට පත් ලිපිකරු සම්බන්ධ කර ගැනීමට ව්‍යාපාරිකයාට හැකි වී ඇති බව වාර්තා වෙයි.

පසුව දෙදෙනා අතර හිතවත්කමක් ගොඩ නැගී ඇති බවත්, එකී නිලධාරියා ගොඩනැල්ලට අදාළව සිදු කිරීමට නියමිත ඉදිරි නීතිමය කටයුතු නවතා දැමීමට නම් රුපියල් ලක්ෂ එක හමාරක මුදලක් ලබා දෙන ලෙස ව්‍යාපාරිකයාගෙන් ඉල්ලා ඇති බවත්, පරීක්ෂණවල දී හෙළිව තිබේ.