(යොහාන් භාසුර)

විදුලිබල මණ්ඩලය විශාල මූල්‍ය අර්බුදයකට ලක්ව සිටින බවත් එම මණ්ඩලයේ පිරිවැය ප්‍රතිපූර්ණ කරගැනීම සඳහා විදුලි ගාස්තු ඉහළ දැමීම අනිවාර්යෙන් කළ යුතු බවත් විදුලිබල මණ්ඩලයේ සභාපති නලින්ද ඉලංගකෝන් මහතා අද (7) පැවසීය.

විදුලිබල මණ්ඩලය විදුලි ඒකකයක් අඩු මිලකට සැපයීම සහ පිරිවැය ඉහළ යෑමට සාපේක්‍ෂව 2013 වසරේ සිට ක්‍රමානුකූලව විදුලි ගාස්තු ඉහළ නොදැමීම හේතුවෙන් මෙම තත්වය උද්ගත වී ඇති බව කී සභාපතිවරයා එම මණ්ඩලයේ සෙසු වියදම් අඩු කිරීමට ද විදුලිබල අමාත්‍යවරයා උපදෙස් දී ඇති බව ද සඳහන් කළේය.

රජය ලබන වසරේ සිට පැය 24 පුරා විදුලිබල සැපයුම ලබාදීමට තීරණය කර තිබීම හේතුවෙන් ගාස්තු වැඩි කිරීමකින් තොරව අඛණ්ඩව විදුලිය සැපයීම ක්‍රියාත්මක කළ නොහැකි බවත් එසේ වුවද විදුලි ගාස්තු ඉහළ දැමීම මහජන උපයෝගිතා කොමිසම සහ විදුලිබල අමාත්‍යංශය යන ආයතනය එකතුව ක්‍රියාත්මක කළ යුතු බවත් සභාපතිවරයා කීය.

විදුලි නිෂ්පාදනයට අවශ්‍ය ගල්අගුරු නියමිත පරිදි ඇනවුම් කර ඇති බව කී සභාපතිවරයා ගල්අගුරු පිළිබඳ ගැටලුවක් මතු නොවන බව ද පැවසීය.