(බිමල් ශ්‍යාමන් ජයසිංහ සහ ඩී.ජී. සුගතපාල)

ඉන්දුනීසියාවේ ජාකාර්තා නුවරදී අත්අඩංගුවට ගත්  කෙහල්බද්දර පද්මේ විසින් නුවරඑළිය ප්‍රදේශයේ පවත්වාගෙන ගිය අයිස් මත්ද්‍රව්‍ය නිෂ්පාදනාගාරය සඳහා රැගෙන ආ බව කියන රුපියල් කෝටි 250 ක් පමණ වටිනා රසායනික ද්‍රව්‍ය තොගයක් මිද්දෙණිය තලාව ප්‍රදේශයේ වත්තක වළඳමා තිබියදී සොයා ගත් බව බස්නාහිර පළාත උතුර අපරාධ කොට්ඨාසය කියයි

පසුගියදා මෙරටට  රැගෙනා ආ සංවිධානාත්මක අපරාධ කල්ලි නායකයන් පස්දෙනාගෙන් තිදෙනෙකුවන කෙහෙල් බද්දර පද්මේ, පානදුරට නිලංග හා කොමාන්ඩෝ සලින්ත යන තිදෙනා අපරාධ පරීක්ෂණ දෙපාර්තමේන්තුව බාරයේත් බැකෝ සමන්ත සහ  ලහිරු මදුසංක නොහොත් තැඹිලි ලහිරු යන දෙදෙනා බස්නාහිර පළාත් උතුර අපරාධ කොට්ඨාසේ  රඳවාගෙන ප්‍රශ්න කරමින් සිටී.

ඒ සම්බන්ධයෙන් බස්නාහිර පළාත් උතුර අපරාධ කොට්ඨාසයේ අධ්‍යක්ෂක සහකාර පොලිස් අධිකාරී රෝහන් ඕලුගල මහතාගේ උපදෙස් මත මෙහෙයුම් අංශයේ ස්ථානාධිපති ප්‍රධාන පොලිස් පරීක්ෂක ලින්ටන් ද සිල්වා මහතා විසින් බැකෝ සමන්ත නැමැත්තාගෙන් සිදුකළ ප්‍රශ්න කිරීමේදී එලෙස රැගෙන ආ රසායනික ද්‍රවය අඩංගු කන්ටේනර් දෙකක් මිද්දෙණිය ප්‍රදේශයේ සඟවා ඇති බවට තොරතුරු අනාවරණය කර ගැනීමට හැකි වී ඇත

පෑලියගොඩ උතුරු අපරාධ කොට්ඨාසයේ අධ්‍යක්ෂක රෝහන් ඕලුගල මහතාගේ උපදෙස් මත මෙහෙයුම් අංශයේ ස්ථානාධිපති ප්‍රධාන පොලිස් පරීක්ෂක ලින්ටන් ද සිල්වා මහතා ඇතුළු කණ්ඩායමක් පරීක්ෂණ පවත්වයි