(සුජිත් හේවාජුලිගේ සහ  අංජුල මහික වීරරත්න )

අයවැය විසර්ජන පනත් කෙටුම්පත (2022) දෙවැනි වර කියවීම වැඩි ඡන්ද   93 කින් පාර්ලිමේන්තුවේදී අද (22) පස්වරුවේ  සම්මත විය.

විසර්ජන පනතට පක්ෂව ඡන්ද 153ක්  ලැබුණු අතර ඊට විරුද්ධව ලැබුණේ ඡන්ද 60ක් පමණි.

සමගි ජන බලවේගය ජනතා විමුක්ති පෙරමුණ සහ දෙමළ ජාතික සන්ධානය යන පක්ෂවල මන්ත්‍රීවරු විසර්ජන පනතට විරුද්ධව ඡන්දය ප්‍රකාශ  කළහ.

ඡන්ද විමසීම ආරම්භ වූයේ පස්වරු පහට පමණය. මැතිසබයේ  ඉලෙක්ට්‍රෝනික ඡන්ද ගණනය කිරීමේ පද්ධතිය ඔස්සේ  මන්ත්‍රීවරුන්ගේ ඡන්දය ලබා ගැනීම සිදු කෙරිණ.

අයවැය විසර්ජන පනත් කෙටුම්පත  දෙවැනිවර කියවීම සඳහා මුදල් අමාත්‍ය බැසිල් රාජපක්ෂ මහතා විසින් පාර්ලිමේන්තුවට  පසුගිය 12 වැනිදා සිකුරාදා  ඉදිරිපත් කරනු ලැබීය.

ඉන්පසු   අයවැය  දෙවැනි වර  කියවීමේ විවාදය පසුගිය 13 වැනිදා සෙනසුරාදා සිට  ආරම්භ කෙරිණ.

මේ අනුව දෙවැනි වර කියවීමේ විවාදය පැවැත්වුණු දින ගණන  7කි.

දෙවැනි වර කියවීමේ විවාදය අවසන් වීමෙන් පසු අයවැය කාරක සභා අවස්ථාවේ විවාදය
අද( 23) සිට ආරම්භ කෙරෙන අතර එය ලබන මස 10වැනිදා  දක්වා දින 16ක් පැවැත්වීමට නියමිතය.

අයවැය  විසර්ජන පනත් කෙටුම්පත පිළිබඳ අවසාන ඡන්ද විමසීම ලබන මස
10 වැනිදා පස්වරු 5.00ට පැවැත්වේ.