(සුජිත් හේවාජුලිගේ සහ  අංජුල මහික වීරරත්න)

ජාත්‍යන්තර මූල්‍ය අරමුදල සමඟ ගිවිසුමකට අවතීර්ණවූ පසු ඒ පිළිබඳ විස්තර අදාළ කමිටුවලට  ලබාදීමට සූදානම් බව  අගමැති දිනේෂ් ගුණවර්ධන මහතා පාර්ලිමේන්තුවේදී අද (04) පැවසීය.

දැනට තිබෙන්නේ එකඟතා ගිවිසුම් පිළිබඳ කෙටුම්පතක් පමණක්  බවද අගමැතිවරයා ප්‍රකාශ කළේය.

අගමැතිවරයා මෙසේ පැවසුවේ ජාත්‍යන්තර මූල්‍ය අරමුදල සමග රජය ඇතිකරගෙන ඇති කාර්ය මණ්ඩල ගිවිසුම සභාවට ඉදිරිපත් නොකරන්නේ මන්දැයි කොළඹ දිස්ත්‍රික් මන්ත්‍රී විමල් වීරවංශ මහතා ඇසූ ප්‍රශ්නයකට පිළිතුරු ලබාදෙමිනි.

ජාත්‍යන්තර මූල්‍ය අරමුදල සමඟ ගිවිසුම පිළිබඳ  ප්‍රශ්නය කිහිප වතාවක්ම පාර්ලිමේන්තුවේදී නැගූ  බවත් ඒ සම්බන්ධයෙන් මීට පෙර සභානායකවරයාද, මුදල් අමාත්‍යංශයද පිළිතුරු දී ඇති  බවත් අගමැතිවරයා සඳහන් කළේය.

විමල් වීරවංශ  මහතා:

ජාත්‍යන්තර මූල්‍ය අරමුදල සමග රජය කාර්ය මණ්ඩල ගිවිසුමකට ගිහින් තියෙනවා.ඒ ගිවිසුම ඇයි සභාවට ඉදිරිපත් කරන්නේ නැත්තේ? රට දැනගන්න ඕනේ නැද්ද?"

අගමැති දිනේෂ් ගුණවර්ධන :

තවම ගිවිසුමකට අවතීර්ණය වෙලා නෑ... එකඟතා ගිවිසුමක කෙටුම්පතක් පමණයි තිබෙන්නේ. ඉන් අනතුරුව ඒ පිළිබඳ විස්තර අදාළ කමිටු වලට සුවිශේෂව ලබාදීමට පුළුවන්කම ඇති වෙනවා.

විමල් වීරවංශ :

"ජාත්‍යන්තර මුල්‍ය අරමුදලේ ඇතැම් ප්‍රකාශකයන්, මම දන්නේ නෑ ප්‍රවෘත්ති වරදවා දාලාද කියලා. කාර්ය මණ්ඩල ගිවිසුමකට අවතීරණවී ඇත කියන එක ඒ වාර්තාවල තිබුණා. නමුත් ඔබතුමා කියනවා නම් වගකීමෙන් කාර්ය මණ්ඩල ගිවිසුමක් නෑ කියලා අපිට ඒක පිළිගන්න පුළුවන්. නමුත් එහෙම වාර්තා තිබුණා.