ජුනි මස 24 වැනිදා සිට ඇමෙරිකාවේ තිරගත වීම ඇරඹුණු, දැනටමත් ඇ.ඩො. මිලියන 15කට අධික ආදායමක් වාර්තා කර තිබෙන සුපිරි යුදමය ශානරයේ චිත්‍රපටයක් ලෙස "Free State of Jones" සැලකිය හැකිය.

මෙම නවතම චිත්‍රපටයට පිරිවැය වශයෙන් වැයවී ඇති මුදල ඇ.ඩො.මිලියන 50කි. ඔස්කාර් සම්මානලාභී නළු මැතිව් මැක්කොනාගි, ගුගු ම්බතා-රෝ, මහේර්ෂලා අලී සහ කෙරී රසල් ප්‍රධාන චරිත සඳහා දායකත්වය ලබාදෙන මෙහි කතා පුවත දිව යන්නේ 19 වැනි සියවසේ සිටි ඇමෙරිකානු ගොපල්ලකු වන නිව්ටන් නයිට්ගේ ජීවිත කතාව වටාය. විශේෂයෙන්ම ඇමෙරිකානු සිවිල් යුද්ධයේදී මිසිසිපිහි පැවැති රාජ්‍ය හවුල වෙනුවෙන් අරගල කළ සිවිල් වැසියෙකු පසුබිම් කර ගත් මෙහි සම නිෂ්පාදනය ජෝන් ක්ලික්, ගැරී රෝස් සහ ස්කොට් ස්ටුබිවර්ගෙනි.

ගැරී රෝස්ගේ අධ්‍යක්ෂණයෙන්ද නිර්මාණය වූ මෙම චිත්‍රපටයේ කතාව ලියනොඩ් හාට්මන්ගෙනි. තිර රචනයද අධ්‍යක්ෂ ගැරී රෝස්ගෙනි. ප්‍රංශ සිනමා කැමරාකරුවකු වන බෙනොයිට් ඩෙල්හෝම්ගේ සිනමා කැමරාකරණයකි. ජනප්‍රිය සිනමා සංගීතඥ නිකොලාස් බ්‍රිටෙයිල්ගේ සිනමා සංගීතයෙන් හැඩගැන්වුණු මෙම චිත්‍රපටය මේ වනවිට මේ සතියේ බොක්ස් ඔෆිස් චිත්‍රපට දර්ශකයේ හයවැනි ස්ථානයේ පසුවන නිර්මාණයකි.

මාලන්