පොලිස් මූල්‍ය අපරාධ කොට්ඨාසය තමා අත්අඩංගුවට ගැනීමේ සූදානමක් පවතින බව දැන ගන්නට ලැබී ඇති බැවින් එය වළක්වන අතුරු නියෝගයක් නිකුත් කරන්නැයි ඉල්ලා හිටපු ආරක්ෂක ලේකම් ගෝඨාභය රාජපක්ෂ මහතා ගොනු කළ  මූලික අයිතිවාසිකම් පෙත්සම  ලබන ජනවාරි 28 වැනදා කැඳවීමට ශ්‍රේෂ්ඨාධිකරණය තීරණය කර තිබේ.

අගවිනිසුරු කේ. ශ්‍රී පවන් ,ප්‍රියන්ත ජයවර්ධන සහ උපාලි අබේරත්න යන මහත්වරුන් ගෙන් යුතු ත්‍රීපුද්ගල විනිසුරු මඩුල්ලක් හමුවේ මෙම පෙත්සම කැඳවු අතර එහිදී පෙත්සම්කාර හිටපු ආරක්ෂක ලේකම්වරයා වෙනුවෙන් පෙනී සිටි ජනාධිපති නීතීඥ රොමේෂ් ද සිල්වා මහතා කියා සිටියේ මේ වන විට අමාත්‍ය මණ්ඩලය සංශෝධන සිදුව ඇති හෙයින් පෙත්සමේ වගඋත්තරකරුවන් ලෙස නව අමාත්‍ය මණ්ඩලයේ සාමාජිකයින් ද ඇතුළත් කළ යුතු බවයි.ඒ සඳහා කල් ලබා දෙන ලෙස හෙතෙම ඉල්ලා සිටියේය.

ඒ අනුව පෙත්සම සලකා බැලීම මෙදිනට කල් තැබීමට හා සංශෝධිත පෙත්සම් ඉදිරිපත් කිරීමට අවසර ලබාදීමටද ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල තීරණය කළේය.

අගමැති රනිල් වික්‍රමසිංහ මහතා ඇතුළු අමාත්‍ය මණ්ඩලයද, ජනාධිපති ලේකම්, පොලිස්පති, අපරාධ පරීක්ෂණ දෙපාර්තමේන්තුවේ අධ්‍යක්ෂ, මූල්‍ය අපරාධ විමර්ශන කොට්ඨාසය බාර නියෝජ්‍ය පොලිස්පති ඇතුළු පිරිසක් වගඋත්තරකරුවන් ලෙස නම් කරනු ලැබ සිටිති.