(බිමල් ශ්‍යාමන් ජයසිංහ සහ රේඛා තරංගනී ෆොන්සේකා)

කඩු පොලු අතැතිව කඩා වැදුණු සිව්දෙනකුගෙන් යුත් කල්ලියක්  සිදුකළ පහරදීමකින් පුද්ගලයකු ඝාතනයට ලක්වී තවත් අයකු බරපතළ තුවාල ලබා ඇතැයි අඟුලාන පොලිසිය කියයි.

ඝාතනයට ලක්ව ඇත්තේ බලාපු වඩුගේ සුදීර සම්පත් නොහොත් උක්කුන් නමැති 26 හැවිරිදි පුද්ගලයෙකි.

බරපතල තුවාල ලබා ඇත්තේ ඔහුගේ මාමා කෙනෙකි.

ඝාතනයට ලක්වූ පුද්ගලයා අඟුලාන සිය නිවස ඉදිරිපිට දුම්රිය මාර්ගයේ හිඳගෙන සිටිය දී කඩු පොලු ඇතැතිව කඩා වැදුණු වැදුනු එකම පවුලේ සහෝදරයන් තිදෙනකු සහ ඔවුන්ගේ තවත් ඥාති සහෝදරයකු එක්ව එම පුද්ගලයා ට පහර දී ඇතැයි පොලීසිය සඳහන් කරයි.

තම ඥාති පුතුට පිරිසක් කඩු පොලු වලින් පහර දෙන දුටු නිවස තුළ සිටි ඥාතියෙකු වන බරපතළ තුවාල ලද පුද්ගලයා ඔහුව බේරා ගැනීම සඳහා එම ස්ථානයට දිව යාමේ දී එම පුද්ගලයාට ද පිරිස පහරදී බරපතළ තුවාල සිදුකර පලාගොස් තිබූ බව පොලිස් නිලධාරියකු පැවැසීය.

ඝාතනයට ලක්වූ පුද්ගලයා තදින් මත්කුඩුවලට ඇබ්බැහි වූවකු බවත් පහරදීමට පැමිණි පුද්ගලයන් සිව්දෙනා සමඟ ඊට සුළු මොහොතකට ඉහත දී ඒ අසල නිවසක් තුළදී මත්කුඩු පානය කළ බවට ද තොරතුරු ලැබෙමින් පවතින බව පොලිසිය කියයි.

ඒ බව තහවුරු කරගැනීම සඳහා මත්කුඩු පානය කිරීමෙන් අනතුරුව බිම දමා තිබූ කොළ කැබලි කීපයක් නිවස තුළ තිබී පොලිසිය මඟින් සොයාගෙන ඇත.

මෙම පහරදීමට හේතුව මත්කුඩු මිලදී ගැනීමේ සිද්ධියක් ද ? ජංගම දුරකථනයක් හා බැදුනු සිද්ධිය ක්ද යන්න නිශ්චිත ලෙස අනාවරණය වී නැතැයි ඇතැයි පොලිසිය කියයි.

කඩු පොලු වලින් පහර කෑමෙන් බරපතල තුවාල ලද දෙදෙනාම ලුනාව රෝහල වෙත ඇතුළත් කිරීමෙන් අනතුරුව එම පුද්ගලයා මියගොස් තිබූ බව පොලිස් නිලධාරියෙක් පැවැසීය.