(නිමල කොඩිතුවක්කු)

දහනවවන ව්‍යවස්ථා සංශෝධනය අහෝසි කිරීමට එරෙහිව ප්‍රජාතන්ත්‍රවාදයට  ගරු කරන සියලු කණ්ඩායම්වලට එක වේදිකාවකට එන්නැයි සමගි ජන බලවේගය ආරාධනා කර සිටින බව පාර්ලිමේන්තු මන්ත්‍රී හර්ෂණ රාජකරුණා මහතා කොළඹදී අද(28)පැවසීය.

තුනෙන් දෙකේ බලයෙන් ජනතාවට යහපතක් කරනවා වෙනුවට බැසිල් රාජපක්ෂ මහතා පාර්ලිමේන්තුවට ගෙන ඒමට සහ අමාත්‍ය ධුර වැඩිකර ගැනීමට දරන උත්සාහය පිළිබඳ විපක්ෂය කනගාටුවට පත්වන බවද රාජකරුණා මහතා සඳහන් කළේය.

රටත් ජනතාවත් පිළිබඳ සිතා කටයුතු කරනවා වෙනුවට 2015ට පෙර මෙන් එක පවුලක් ඉලක්ක කර ගනිමින් රටේ පාලනය ක්‍රියාත්මක වෙමින් තිබෙන බවද ඇතුල්කෝට්ටේ පිහිටි සමගි ජන බලවේගය ප්‍රධාන කාර්යාලයේ පැවති මාධ්‍ය හමුවකට එක්වෙමින් ඔහු පැවසීය.

එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී හර්ෂණ රාජකරුණා මහතා මෙසේද කීය.
''වත්මන් රජයට ලැබී තිබෙන තුනෙන් දෙකේ බලය ප්‍රජාතන්ත්‍ර විරෝධී පවුල් පාලනයක් වෙනුවෙන් යොදා ගන්නා ආකාරයක් පේන්න තියෙනවා. මේ අය බලයට පත්වූ වහාම දහනමය අහෝසි කර අලුත් ව්‍යවස්ථාවක් ඇති කිරීම ගැන කතා කරනවා.

2015ට පෙරත් තුනෙන් දෙකක බලයක් ලබාගෙන කළ ව්‍යවස්ථා සංශෝධනයකින්  කළේ පවුල් පාලනය ශක්තිමත් කිරීම සහ ප්‍රජාතන්ත්‍ර විරෝධී වැඩපිළිවෙළක් ක්‍රියාත්මක කිරීමයි. අදත් මේ අය ඒ දේම කරනවා.

19 වන සංශෝධනය ඉවත් කිරීම බලපාන ප්‍රදාන කාරණා කිහිපයක් මේ රජයට තියෙනවා. 19 ඉවත් කරන්නේ බැසිල් රාජපක්ෂ මහතාට යළිත් පාර්ලිමේන්තු වරම් ලබා දීම සඳහායි. පාර්ලිමේන්තු වරම් ලැබුණට පස්සේ ඔහුට මහින්ද රාජපක්ෂ ට පස්සේ තිබෙන බලවත්ම අමාත්‍යංශය ලැබේවි.

ඒත් එක්කම 19 අහෝසිකර අමාත්‍යධුර සීමාවන් ඉවත් කර ගැනීමේ උත්සාහයක් තියෙනවා. දැනටමත් අමාත්‍යධුර නොලැබී සතුටින් ඉන්න අයට කියලා තියෙනවා 19 සංශෝධනය කිරීම තුළින් අමාත්‍ය ධුර ලබා දෙනවා කියලා. ජ්‍යෙෂ්ඨයන් වුණත් මහින්ද රාජපක්ෂ සමග හිටගත්තෙ නැති අයට අමාත්‍ය ධුර ලබා දීලා නැහැ. ඒ අයට දැන් යළිත් කැරට් අලයක් පෙන්වලා තුනෙන් දෙක තහවුරු කරගන්න මේ අය උත්සාහ කරනවා.
ආණ්ඩුවට ලැබුණු තුනෙන් දෙක රටේ යහපත වෙනුවට තමන්ගේ තම පවුලේ උදවියගේත් යහපැවැත්මට යොදාගෙන තිබෙනවා. දේශපාලන භේදයකින් තොරව මෙයට එරෙහිව ඡන්දෙ දෙන්න කියලා අපි සියලුම දෙනාගෙන් ඉල්ලීමක් කරනවා.

ස්වාධීන කොමිෂන් සභා අනවශ්‍ය බවට අද මේ අය පෙන්වමින් යනවා. ස්වාධීන කොමිෂන් සභාවල යම් කිසි අඩුපාඩුවක් තියෙනවා නම් පාර්ලිමේන්තු හමුවට ඉදිරිපත් කරලා ඒවා නිවැරදි කර ගැනීමේ හැකියාවක් තියෙනවා. එහෙම නැතුව 19 මුළුමනින්ම අහෝසි කරන යෝජනාවට අපි විරුද්ධයි. ප්‍රජාතන්ත්‍රවාදයට ගරු කරන සියලුම කණ්ඩායම් වලට මේ සටන වෙනුවෙන් අපිත් එක්ක එක වේදිකාවකට එන්න කියලා අපි යෝජනා කරනවා.

ආර්ථිකය විශාල අර්බුදයට ලක්වෙලා තිබෙන අවස්ථාවක වත්මන් රජය අතුරු අතුරු සම්මත ගිණුම මගින් විශාල ණය මුදලක් ලබා ගන්න කටයුතු කරනවා. ආර්ථිකය කඩාවැටිල රට ණය උගුලක හිර වෙලා තියෙද්දි 19  අහෝසි කරලා තව අමාත්‍යංශ වැඩිකළොත් ඒ වියදම දරා ගන්න වෙන්නෙත් රටේ අහිංසක ජනතාවටයි. මේ අතුරු අතුරු සම්මත ගිණුමෙන් වෙන්කල මුදල් වලින් 36% ක් වෙන් කරලා තියෙන්නේ ගෝඨාභය රාජපක්ෂ, මහින්ද රාජපක්ෂ, නාමල් රාජපක්ෂ, චමල් රාජපක්ෂ කියන එක ම පවුලේ පිරිසකටයි. මේ ආණ්ඩුව ලබාගන්න මහන්සි වෙච්ච අනිත් ඇමතිවරුන්ට කරන්න තියෙන්නේ උඩ බලාගෙන ඉන්න එක විතරයි.

එක රටක් එක නීතියක් කියාගෙන බලයට ආපු මේ ආණ්ඩුවෙ  පිරිස පුත්තලම ඉස්සන් වගාවක් සඳහා අභය භූමියක අක්කර දෙකකට වඩා නීති විරෝධීව විනාශ කරලා තියෙනවා. ඔක්සිජන් ඕනේ නැහැ කියපු අමාත්‍යවරයෙක් තමයි මේ දිස්ත්‍රික්කයේ නායකත්වය ගෙන කටයුතු කළේ.

කුරුණෑගලට වෙච්ච දේම තමයි අද පුත්තලමටත් වෙන්නේ. ඒ අයගේ පිරිස්වලට නීතිය ක්‍රියාත්මක වන්නේ නැහැ. අනෙක් පැත්තෙන් සිංහරාජ විනාශ කරමින් මාර්ගයක් ඉදි කරමින් යනවා. ඇයි මේවට රටේ නීතිය ක්‍රියාත්මක කරන්නෙ නැත්තෙ කියල අපි මේ රජයෙන් විමසනවා'' යැයි  මන්ත්‍රී හර්ෂණ රාජකරුණා මහතා  කීය.