(ඩයනා උදයංගනී)

තද වැසි සහ සුළං සහිත කාලගුණ තත්ත්වය හේතුවෙන් දිස්ත‍්‍රික්ක 14 කට අයත් පවුල් 17,769 කට අයත්, පුද්ගලයින් 71,100 දෙනෙකු පීඩාවට පත්ව ඇතැයි ආපදා කළමනාකරණ මධ්‍යස්ථානය පවසයි.

ඔවුන් අතුරින් පවුල් 2,611 කට අයත් 12,000 ක පිරිසක් ආරක්‍ෂිත ස්ථාන 28ක රඳවා සිටින බව ආපදා කළමනාකරණ මධ්‍යස්ථානයේ සහකාර අධ්‍යක්‍ෂ ප‍්‍රදීප් කොඩිප්පිලි මහතා පැවසීය.

ජල ගැලීම් හේතුවෙන් වැඩි බලපෑමක් එල්ල වී ඇත්තේ කළුතර, ගාල්ල, කොළඹ, ගම්පහ සහ අනුරාධපුර දිස්ත‍්‍රික්කයන්ට වන අතර කුරුණෑගල, නුවරඑළිය, මහනුවර, කෑගල්ල, රත්නපුර, සහ පුත්තලම යන දිස්ත‍්‍රික්කයන්හි ජනතාවද තද සුළං, පස් කඳු හා ගස් කඩාවැටීම් හේතුවෙන් පීඩාවට පත්ව සිටින බව කොඩිප්පිලි මහතා සඳහන් කළේය.