එෆ්.අස්ලම්
 
 
පුද්ගල පහරදීමක් සිදුකර තියුණු ආයුධ වලින් කපා කොටා දැමීමට පැමිණි ආවා කල්ලියේ සාමාජිකයින් තිදෙනෙකු යාපනය කෝපායි පොලිසිය විසින් අත්අඩංගුවට  ගනු ලැබීය.
 
මෙම සාමාජිකයින් තිදෙනා සන්තකයේ තිබූ කඩුවක් සහ රැම්බෝ වර්ගයේ පිහියක් ඔවුන් පැමිණි යතුරුපැදිය ද සමගින් පොලිසිය බාරයට ගෙන ඇත.
 
මෙලෙස අත්අඩංගුවට ගෙන ඇත්තේ ආවා කල්ලියේ ප්‍රබල සාමාජිකයින් වන සදාරත්නම් තහිදරන් සහ කුමාරස්වාමි ජරුෂන්, ඥානලිංගම් ජානුෂන් නැමති තිදෙනෙකු බව පොලිසිය සඳහන් කරයි.
 
කෝපායි ප්‍රදේශයේ ගජලක්ෂන් නැමති තරුණයකුට පහරදීම සඳහා ආවා සාමාජිකයින් හය දෙනෙකු කෝපායි ප්‍රදේශයට පැමිණ ඇති අතර මොවුන්ව දැක  එම තරුණයා පලා යාමට තැත් කර ඇත.
 
මෙහිදී තාප්පයක් යැයි සිතමින් පැනීමේදී ළිඳකට වැටී ඇති එම තරුණයා ළිදෙහි යකඩ ආධාරකයක් අල්වාගෙන දිවි බේරාගෙන සිටියෙදී ආවා සාමාජිකයින් විසින් ඔහුට ගල්වලින් පහර දී තිබිණි.
 
මෙම අපරාධය දුටු ගම්වාසීන් කඩිනමින් ඒ බව පොලිසියට දැනුම් දීමත් සමඟ කෝපායි ස්ථානාධිපති පොලිස් පරීක්ෂක එස්.එම්.කහදවල මහතා ප්‍රමුඛ නිලධාරීන්  කඩිනමින් ක්‍රියාත්මක වී ළිදෙහි වැටී සිටි තරුණයා මුදාගනිමින් පහර දීම සිදුකළ ආවා සාමජිකයින් අතරින් තිදෙනෙකු අත්අඩංගුවට ගෙන තිබේ.