ක.ග කරුණාරත්න

 

අංගම්මැඩිල්ල ජාතික වනෝද්‍යානයට අයත් අඹන්ගඟේ නීතිවිරෝධී ලෙස මැණික් ගැරීමේ ජාවාරමක යෙදී සිටි බව කියන සබරගමුව පළාත් සභාවේ හිටපු මන්ත්‍රීවරයකු සහ වනජීවී දෙපාර්තමේන්තුවේ නියාමකවරුන් දෙදෙනෙකු ඇතුළු පුද්ගලයන් 15 දෙනෙකු අද (17) අලුයම අත්අඩංගුවට ගත් බව පොලිසිය කියයි. 

වනජීවී නියෝජ්‍ය ඇමැති පාලිත තෙවරප්පෙරුම මහතාට ලැබුණු තොරතුරක් මත මහ වනය මැද සිදුකළ පැය 10 ක පමණ මෙහෙයුමකින් පසුව මේ සැකකරුවන් අත්අඩංගුවට ගෙන තිබේ.

ඔවුන් සතුව මැණික් ගැරීම සඳහා උපයෝගී කරගන්නා ගැරුම් වට්ටි, ඉල්ලම් කූරු, කිමිදුම් කට්ටල, ඔක්සිජන් සිලින්ඩර්, ගෑස් සිලින්ඩර් යනාදිය තිබූ බව ද පොලීසිය කියයි.

සැකකරුවන් පැමිණි බව කියන ඩබල් කැබ් රථයක්, නවීන පන්නයේ මෝටර් රථයක් සහ වෑන් රථයක්ද පොලිස් බාරයට ගෙන තිබේ.

අත්අඩංගුවට පත් හිටපු පළාත් සභා මන්ත්‍රීවරයා ඇහැලියගොඩ, එල්ලාවල ප්‍රදේශයේ පදිංචිකරුවෙකි.

වනජීවී නියාමකවරුන් දෙදෙනාගෙන් එක් අයකු යාල ජාතික වනෝද්‍යානයේ සේවය කරන බවත් අනෙක් වනජීවී නියාමකවරයා අංගමැඩිල්ල ජාතික වනෝද්‍යානයේ රාජකාරී කරන බවත් අනාවරණය වී ඇත.

සෙසු සැකකරුවන් පිරිස කොළඹ සහ අවිස්සාවේල්ල අවට පදිංචිකරුවෝ වෙති.