(රන්න චන්ද්‍රසේන ගමගේ සහ තංගල්ල ආරියදාස කොඩිතුවක්කු)

පෞද්ගලික කුරුළු උයන් වල හා නිවාස වල ඇති කරනු ලබන ඉතා වටිනා විදේශීය පක්ෂීන් සොරකම් කොට අළෙවි කිරීමේ නිරත වූ සොරමුලක් අත් අඩංගුවට ගැනීමට තංගල්ල කොට්ඨාශ අපරාධ විමර්ශන අංශයේ නිළධාරීන් සමත්ව තිබේ.

පසු ගිය 06 වැනි දින හම්බන්තොට පිහිටි පෞද්ගලික කුරුළු උයනේ සිටි විදේශීය පක්ෂීන් රැසක් කිසියම් කෙනෙකු සොරකම් කොට ඇති බවට ලද පැමිණිල්ලකට අනුව සිදු කළ විමර්ශන වලින් අනතුරුව පක්ෂීන් සොරකම් කොට විකිණීමේ ජාවාරමට සම්බන්ධ බවට සැක කෙරෙන පුද්ගලයන් 06 කු  අත් අඩංගුවට ගෙන ඇති බව පොලීසිය පවසයි. සැක කරුවන් 06 දෙනා සමග සොරකම් කරන ලද විදේශීය පක්ෂීන් 23 දෙනෙකු පොලිස් භාරයට ගත් බවත් එම පක්ෂීන් ගේ වටිනා කම දළ වශයෙන් රුපියල් ලක්ෂ 50 ට ආසන්න වෙන බවත් පොලීසිය පවසයි.

මෙම ජාවාරම සදහා සැකකරුවන් සමග  සොරකමට භාවිතා කළ මෝටර් රථයක්ද පොලීසිය විසින් සොයා ගෙන අති අතර එය ව්‍යාජ අංක තහඩු භාවිතා කොට පාවිච්චි කරන ලද බවට තොරතුරු ලැබී ඇතැයිද පොලීසිය පවසයි. මෙම මොටර් රථය සැකකරුවන් විසින් තිස්සමහාරාම ප්‍රදේශයෙන් කුලියට ගත් එකකි.

සැක කරුවන් සමග පොලිස් භාරයට පත් පක්ෂීන්ද මෝටර් රථයද අද (19) දින හම්බන්තොට අධිකරණයට ඉදිරිපත් කරන බව පොලීසිය පවසයි.