(විනීතා එම් ගමගේ සහ ටී කේ ජී කපිල)
            
ව්‍යාජ ලියකියවිලි සකසා විදේශ ගත කළ දස හැවිරිදි දැරියක් බලධාරින්ට අසු නොවී තෙවතාවක් ලියාපදිංචි වී විදේශ ගත වීමේ පුවතක් ඇය විදේශ ගතවී වසර 8කට පසු හෙළිවී තිබේ.


ත‍්‍රිකුණාමලයේ කින්නියා හි පදිංචිකාරියක වන ඇය මේ වනවිට 18 වැනි වියේ පසු වන්නීය. 2000 වසරේ උපත ලබා ඇති ඇය අතිශයින් දුගී පවුලක සාමාජිකාවක බවත් ඇගේ දෙමව්පියන් ජීවත්ව සිටින බවත් හෙළි වී තිබේ.


ඇය මුල්වරට විදේශ ගත වීම සඳහා ගෘහ සේවිකා පුහුණුව ලබාගෙන ඇත්තේ ශ්‍රී ලංකා විදේශ සේවා නියුක්ති කාර්යංශයේ බදුල්ල පුහුණූ මධ්‍යස්ථානයෙන් වන අතර ඒ වනවිට ඇය දස හැවිරිදි වියේ පමණ පසුව ඇතැයි හෙළිවී තිබේ. 


අබ්දුල් මොහොමඩ් නමැති ව්‍යාජ නමකින් ඇය වෙනුවෙන් සියලූ ලියකියවිලි සකස් කර විදේශ ගත කර ඇති බවත් වයස අවුරුදු දහය පසුවනවාත් සමඟ සවුදි අරාබියේ සේවයට ගොස් ඇති අතර ඊළඟට සේවයට ගිය කළ රටේ නම වත් ඇය නොදන්නා බව හෙළිවී තිබේ. 


ඇය තෙවැනි වතාවට විදේශ ගත වී ඇත්තේ  ඕමානයේ ගෘහ සේවිකාවක් ලෙසිනි. එහි දී සේවා ස්ථානයේ ඇති වූ යම් ප‍්‍රශ්නයක් මත ඇය තානාපති කාර්යාලයට ගොස් ඇති අතර එහි සිට යළි ශ්‍රී ලංකාවට ගෙන්වා ගෙන තිබේ. 


ඉකුත් 19 දා උදෑසන 7.20 ට මෙරටට ළඟා වූ  ඕමාන් ගුවන් සේවයේ ඩබ්ලිව් වයි 371 ගුවන් යානයෙන් කටුනායක ගුවන් තොටුපළ වෙත පැමිණි අවස්ථාවේ අපරාධ පරික්ෂණ දෙපාර්තමේන්තුවේ නිලධාරින් විසින් ඇය අත්අඩංගුවට ගනු ලැබීය. එහි දී කළ පරික්ෂණ හා ප‍්‍රශ්න කිරීම් මත මෙම තොරතුරු හෙළි වී ඇත. 


මෙම තරුණිය රහස් පොලිස් නිලධාරින් විසින් වෛද්‍යවරයකු වෙත යොමු කර ඇති අතර ඇගේ සැබෑ වයස අවුරුදු 18 තරම් වන බව ඔවුන් තහවුරු කර ඇත. 


මේ වනවිට මහත් මතභේදයකට තුඩු දී ඇති පවුල් පසුබිම් වාර්තාව ඇය තෙවැින වතාවට විදේශ ගතවූ කාලය වනවිට අනිවාර්ය වී තිබු අතර එය ද ව්‍යාජ ලෙස සකස් කර ඇය විදේශ ගත කර තිබෙන බව හෙළි වී ඇත. 


කෙසේ වෙතත් ඇය විදේශ ගත කළ විදේශ රැකියා ඒජන්සියේ හිමිකරු  මේවනවිට අත්අඩංගුවට පත්ව ඇතැයි ද කාර්යංශ ආරංචි මාර්ග පවසයි.


මෙසේ ලාබාල දැරියන් විදේශ ගත කිරීමේ මහා පරිමාණ ජාවාරමක් සිදුවන බවත් ඒ  පිළිබඳව පරික්ෂණ පැවැත්වීම සඳහා විදේශ සේවා නියුක්ති කාර්යංශය අපරාධ පරික්ෂණ දෙපාර්තමේන්තුවට බාර දී ඇති බවත් එම ආරංචි මාර්ග තවදුරටත් සඳහන් කරයි.