(නිමන්ති රණසිංහ)

මෙහෙකාර සේවයේ යෙදී සිටිය දී පිළිස්සී මිය ගිය 16 හැවිරිදි ඉෂාලිනි ජූඩ් දැරියගේ දේහය සම්බන්ධ දෙවන පශ්චාත් මරණ පරීක්ෂණය  අද පේරාදෙණිය ශික්ෂණ රෝහල් මෘත ශරීරාගාරයේදී සිදු කළ බව පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසයි.

කොළඹ විශ්වවිද්‍යාලයේ වෛද්‍ය පීඨයේ අධිකරණ වෛද්‍ය විද්‍යාව පිළිබඳ මහාචාර්ය ජීන් පෙරේරා මහත්මිය, කොළඹ විශ්වවිද්‍යාලයේ වෛද්‍ය පීඨයේ අධිකරණ වෛද්‍ය විද්‍යා අංශයේ, ප්‍රධානී සහ ජ්‍යෙෂ්ඨ කථිකාචාර්ය වෛද්‍ය සමීර ගුණවර්ධන හා පේරාදෙණිය ශික්ෂණ රෝහලේ අධිකරණ වෛද්‍ය විද්‍යාව පිළිබඳ විශේෂඥ අධිකරණ වෛද්‍ය ප්‍රභාත් සේරසිංහ යන විශේෂඥ අධිකරණ වෛද්‍ය නිලධාරී මඬුල්ල විසින් මෙම පශ්චාත් මරණ පරීක්ෂණ සිදු කරනු ලැබූ බවද ඔහු පැවසීය .

අද (31) උදෑසන 8.30 සිට සවස 5.15 දක්වා පැය 9ක කාලයක් පුරා මරණ පරීක්ෂණ කටයුතු සිදුකළ බවත්, දැරියගේ මෘත ශරීරය සී.ටී ස්කෑන් පරීක්ෂාවකට ලක්කර ඇති බවත් හෙතෙම පැවසීය.

දැරියගේ මෘත ශරීරයේ අභ්‍යන්තර තුවාල, අස්ථි බිදීම් ආදි කරුණු පිළිබඳව සොයාබැලීම සඳහා මෙම සි ටි පරීක්ෂණය සිදුකළ බව ඔහු සඳහන් කළේය.