අමෙරිකාව තුළ දෙවැනි වරට කොරෝනා වෛරසය පැතිර යාම පිළිබඳ අනතුරු ඇඟවීමක් රෝග පිළිබඳ එරට ජ්‍යෙෂ්ඨ විශේෂඥයෙකු විසින් සිදුකර තිබේ.

රෝග පාලනය සහ වැළැක්වීම පිළිබඳ මධ්‍යස්ථානවල ප්‍රධානී රොබට් රෙඩ්ෆීල්ඩ් මහතා සිදුකර ඇති මෙම අනතුරු ඇඟවීම අනුව මෙම දෙවැනි පැතිරීම පළමු වරට වෛරසය පැතිරීමට වඩා හානිදායක ප්‍රතිඵල අත්කර දෙනු ඇත.

ඊළඟ ශීත සෘතුවේදී අමෙරිකානු ජාතියට පහරදීමට ඊට හැකියාව පවතින බවත් එය මුල් වතාවට වඩා දුෂ්කර වනු ඇති බවත් ඔහු සඳහන් කරයි.

ශ්වසනය මගින් පැතිරෙන රෝගයක් එකවර අවස්ථා දෙකකදී ව්‍යාප්ත වීම අමෙරිකාවේ සෞඛ්‍ය සේවා පද්ධතියට අධික පීඩනයක් ඇති කරනු ඇතැයිද ඔහු පෙන්වා දෙයි.

ආර්ථික කටයුතු සඳහා අමෙරිකාවේ ප්‍රාන්ත කිහිපයක් විවෘත කිරීමේ සූදානමත් සමඟ මෙම අනතුරු ඇඟවීම සිදුකර ඇති අතර ඉදිරියේදී ඇති විය හැකි දේ සඳහා සූදානම් වීමට එළඹෙන මාස භාවිතා කරන ලෙසත් සමාජ දුරස්ථතා මාර්ගෝපදේශ අඛණ්ඩව ක්‍රියාත්මක කරන ලෙසත් ඔහු අවධාරණය කරයි.

මේ අතර ග්‍රීන් කාඩ් බලපත්‍ර දින 60 කට අත්හිටුවීමට පියවර ගන්නා බව අමෙරිකානු ජනපති ඩොනල්ඩ් ට්‍රම්ප් මහතා ප්‍රකාශ කළේය.

අප ප්‍රථමයෙන් අමෙරිකානු සේවකයින් පිළිබඳ සැලකිලිමත් විය යුතු බව ඔහු සඳහන් කළේය.

ඔහු වැඩිදුරටත් සඳහන් කළේ අමෙරිකාවේ ආර්ථික තත්ත්වය අනුව මෙම අත්හිටුවීමේ කාල සීමාව තවදුරටත් දිර්ඝ විය හැකි බවයි.

ස්ථිර පදිංචිය සඳහා සාමාන්‍යයෙන් වසරකදී ග්‍රීන් කාඩ් බලපත්‍ර ලක්ෂ 10 ක් පමණ අමෙරිකාව නිකුත් කරයි.

ජෝන්ස් හොප්කින්ස් විශ්විද්‍යාලයේ සංඛ්‍යා ලේඛන අනුව මේ වන විට අමෙරිවෙන් වාර්තා වී ඇති කොරෝනා ආසාදිතයින් සංඛ්‍යාව 825,041 ක් වේ.

වෛරසය හේතුවෙන් මේ වන විට එරටේ සිදුවී ඇති මරණ සංඛ්‍යාව 45,063 කි.

(බීබීසී ඇසුරෙනි)

-226-