(රොයිටර් ඇසුරිනි - 055)

බ්‍රිතාන්‍ය පාර්ලිමේන්තුව ආසන්නයේ සිදු වූ වෙඩි තැබීමකින් 12 දෙනකු තුවාල ලබා ඇත. 

බ්‍රිතාන්‍ය පාර්ලිමේන්තුවෙන් පිටතදී විශාල ශබ්ද ඇසුණු බව බ්‍රිතාන්‍ය පාර්ලිමේන්තුවේ සභාපතිවරයා උපුටා දක්වමින් රොයිටර් පුවත් සේවය වාර්තා කළේය.

බ්‍රිතාන්‍ය පාර්ලිමේන්තුව ආසන්නයේ තිබෙන පාලම අසල 12 දෙනකුට ආසන්න පිරිසක් තුවාල ලබා සිටින බව රොයිටර් ඡායාරූප ශිල්පියකු සඳහන් කර තිබේ. 

බ්‍රිතාන්‍ය පාර්ලිමේන්තුවෙන් පිටතදී දෙදෙනකුට වෙඩි තබා ඇති බවත් පාර්ලිමේන්තු ගොඩනැගිල්ල වසා දැමීමට කටයුතු කළ බවත් පාර්ලිමේන්තු නිලධාරියෙක් සඳහන් කළේය. 

මෙම සිදුවීමත් සමඟ පාර්ලිමේන්තු සැසිවාරය තාවකාලිකව නවතා දැමීමට කටයුතු කර ඇති අතර මන්ත්‍රීවරුන්ට සභා ගර්භය තුළම රැඳී සිටින්නැයි උපදෙස් දී තිබේ. 

වෙස්ට්මින්ස්ටර් ආසන්නයේ සිදුවීමක් සම්බන්ධයෙන් පොලිසිය කැඳවූ බවත් මේ වනවිට ආයුද සන්නද්ධ භට සහ පොලිස් පිරිස් පාර්ලිමේන්තුව තුළත් ඒ අවටත් ආරක්ෂාව දැඩි කිරීමටත් කටයුතු කළ බව වාර්තා විය. 

පොලිස් නිලධාරියකුට පිහි පහර එල්ල කිරීමේ සිදුවීමක් සහ තවත් ප්‍රචණ්ඩ ක්‍රියා කිහිපයක් වෙස්ට්මින්ස්ටර් ප්‍රදේශයේ සිදුවූ බවට රොයිටර් පුවත් සේවය වාර්තා කර තිබුණ ද ඒ කිසිවක් තහවුරු කර නොතිබිණි. 

මේ අතර බ්‍රිතාන්‍ය අගමැතිනි තෙරේසා මේ මහත්මියගේ ආරක්ෂිතව සිටින බව ද රොයිටර් පුවත් සේවය වැඩිදුරටත් වාර්තා කර තිබිණි.