ඇමෙරිකානු ජනාධිපති ඩොනල්ඩ් ට්‍රම්ප්ට සහාය දක්වන කලහකාරී පිරිසක් වොෂින්ටන් අගනුවර පිහිටි කැපිටල් ගොඩනැගිල්ලට ඊයේ කඩාවැදීම හේතුවෙන් එහි සිදුවූ වෙඩි තැබීමෙන් තුවාල ලැබූ පොලිස් නිලධාරියකු මරණයට පත්ව ඇත.

 ඒ අනුව ගැටුම්වලින් මියගිය ගණන 5ක් දක්වා ඉහළ ගියේය.

මියගොස් ඇත්තේ, එක්සත් ජනපද කැපිටල් ගොඩනැගිල්ලේ පොලිස් නිලධාරී බ්‍රයන් සික්නික් මහතාය.

‘‘පොලිස් නිලධාරී සික්නික් කලහකාරී පිරිස් විසුරුවා හැරීමට උත්සාහ කළ අවස්ථාවේදී තුවාල ලැබුවා’’ කැපිටල් පොලිසිය නිවේදනයක් නිකුත් කරමින් සඳහන් කළේය.

කලහකාරී පිරිස් සහ ආරක්ෂක අංශ අතර ඇති වූ ගැටුම්වලින් සිවුදෙනක් මියගියහ.

කලහකාරී පිරිස් කැපිටල් ගොඩනැගිල්ලට කඩාවැදුණේ ඇමෙරිකානු කොංග්‍රසයේ පහළ මන්ත්‍රී මණ්ඩලය වන නියෝජිත මන්ත්‍රී මණ්ඩලය සහ ඉහළ මන්ත්‍රී මණ්ඩලය වන සෙනට් සභාව රැස්ව සිටියදී ය. තේරී පත්වූ ජනාධිපති ජෝ බයිඩන්ගේ ජනාධිපතිවරණ ජය තහවුරු කිරීම සඳහා කොංග්‍රස් සාමාජිකයෝ එලෙස රැස්ව සිටියහ.

පොලිස් නිලධාරී බ්‍රයන් සික්නික් තුවාල ලැබීමෙන් පසු රෝහල් ගත කර ඇති අතර ඔහු මරණයට පත්ව ඇත්තේ ඉන් අනතුරුවය.මෙට්‍රොපොලිටන් නිලධාරීන් පොලිස් නිලධාරී සික්නික්ගේ මරණය සම්බන්ධයෙන් පරීක්ෂණ පවත්වන බවත් කැපිටල් පොලිසිය සඳහන් කළේය.

බ්‍රයන් සික්නික් ඇමෙරිකා එක්සත් ජනපද කැපිටල් පොලිසියට එක්වී ඇත්තේ 2008 වසරේ දී ය.

මුලදී සිය ආධාරකරුවන් ඇගයූ ඇමෙරිකානු ජනාධිපති ඩොනල්ඩ් ට්‍රම්ප් පසුව ප්‍රචණ්ඩත්වය හෙළා දැක්කේ ය. කලහකරුවන් ඇමෙරිකානු ප්‍රජාතන්ත්‍රවාදය අපවිත්‍ර කළ බවත් ඔවුන්ට එරෙහිව නීතිය ක්‍රියාත්මක කළ යුතු බවත් ඩොනල්ඩ් ට්‍රම්ප් පැවැසීය.

ඇමෙරිකා එක්සත් ජනපදයේ ජනාධිපතිවරණය පසුගිය වසරේ නොවැම්බර් මස 3 වැනිදා පැවැත්විණි. ඉන් ජය ගැනීමට ඩිමොක්‍රටික් පක්ෂයේ ජනාධිපති අපේක්ෂක ජෝ බයිඩන් සමත් විය. ඉකුත් දෙසැම්බර් මාසයේ පැවැති ඡන්ද ගණ, ඡන්ද විමසීමේදී ද ජෝ බයිඩන්ගේ ජයග්‍රහණය ස්ථීර විය. ඒ අනුව තේරී පත්වූ ජනාධිපති ජෝ බයිඩන්ගේ ජයග්‍රහණය තහවුරු කිරීම සඳහා කොංග්‍රසය ඉකුත් දා (6) රැස්විය.

කලහකාරී පිරිස් කොංග්‍රසය පිහිටි කැපිටල් ගොඩනැගිල්ලට කඩා වැදුණේ එම ක්‍රියාවලිය කඩාකප්පල් කිරීමේ අරමුණෙනි.

රොයිටර්
055