(යොහාන් භාසුර)

පාරිභෝගික කටයුතු පිළිබඳ අධිකාරිය පසුගිය වසරේ කළ වැටලීම්වලට අදාලව මහේස්ත්‍රාත් අධිකරණවල පැවරූ නඩුවලින් රුපියල් මිලියන 207ක් හෙවත් රුපියල් කෝටි 20 කට අධික දඩ මුදල් රජයට ලැබී ඇතැයි එම අධිකාරිය පැවසීය. 

එම අධිකාරිය පසුගිය වසරේ (2024) වැටලීම් 24,761 ක් කර එහිදී නඩු පැවරීම් 23,953ක් කර ඇති බවත් දැනට නඩු පැවරීම් කර නොමැති වැටලීම් සඳහා කඩිනමින් නඩු පැවරීමට කටයුතු කරන බවත් පාරිභෝගික අධිකාරිය කීය. 

උපරිම සිල්ලර මිලට වඩා වැඩි මිලට භාණ්ඩ අළෙවි කිරීම, භාණ්ඩවල තොරතුරු සඳහන් නොකිරීම, තොරතුරු වෙනස් කිරීම, ලකුණු කළ මිල වෙනස් කර වෙනත් මිලක් සඳහන් කිරීම, මිල ප්‍රදර්ශනය නොකිරීම, විදුලි උපාංග සඳහා වගකීම් කාලයක් නොදීම, තොග සගවා තබාගැනීම, විධිමත් බිල්පතක් නොදීම, තරග විරෝධි චර්යාවල යෙදෙමින් වෙළෙදාම් කිරීම සහ කොන්දේසි සහිතව භාණ්ඩ අළෙවි කිරීම ඇතුළු පාරිභෝගික කටයුතු පිළිබඳ අධිකාරිය පනත උල්ලංඝනය කරමින් කළ වරදවල් හේතුවෙන් මෙම දඩපනවා ඇති බව ද එම අධිකාරිය වැඩි දුරටත් සඳහන් කළේය.