(නිමල කොඩිතුවක්කු)

අනුර කුමාර දිසානායක ජනාධිපතිවරයාගේ ක්‍රියාකලාප හා ප්‍රකාශ තුළින් රටේ ජනතාව අතරමං වී ඇති මොහොතක තවමත් ජනතාවට ඇති එකම විසදුම සමගි ජන බලවේගය යැයි එහි නායක සජිත් ප්‍රේමදාස මහතා කොළඹදී පැවසීය.

පාර්ලිමේන්තුවේ බහුතරය සමගි ජන බලවේගයට ලබාදීමෙන් ජනතාවගේ ප්‍රශ්න ගැටලුවලට ඇහුමුකන්දෙමින්  විසදුම් ලබා දෙන ශක්තිමත් ආන්ඩුවක් බිහිකිරීමේ හැකියාව පවතින බවත් ඔහු සඳහන් කළේය.

අනුර කුමාර දිසානායක මහතා ජනාධිපතිවරණ වේදිකාවේ රජයේ සේවකයන් වෙනුවෙන් මාස හයෙන් හයට වැටුප් වැඩි කරන බව පැවසුවත් එය තවදුරටත් මැතිවරණ පොරොන්දුවක් පමණක් බවත් සමගි ජන බලවේගයේ නායක සජිත් ප්‍රේමදාස මහතා මැද කොළඹ දී පෙරේදා(5) පැවති ජන හමුවකදී පැවසීය.

බදු මිල, ඉන්දන මිල, විදුලි බිල අඩු කර පාස්පෝට් පෝලිමට විසදුම් ලබා දෙනවා කිව්වත් කිසිවක් සිදු නොවු බවත් ඔහු සඳහන් කළේය.

විදුලි බිල 33%කින් අඩු කරන බවත් හොරකම අල්ලස දුෂණය නිසා විදුලි බිල වැඩිවන බව පැවසුවත් අද විදුලි බිල අඩු නොවන්නේ ද මේ දුෂණය නිසා ද කියා දැන ගැනිමට අවශ්‍ය බවත් සජිත් ප්‍රේමදාස මහතා පැවසීය.

අත්‍යාවශ්‍ය ආහාරවල මිල අඩු කරනවා යැයි පැවසුවත් සාමාන්‍ය ජනතාව පාරිභෝජනය කරන සහල් සහ පොල් දරාගත හැකි මිලකට දිය නොහැකි බවත් මෑත කාලයේ පොල් පෝලිම් පවා ඇතිව තිබෙන බවත් ඔහු සඳහන් කළේය.

එදා හොරකම දූෂණය වංචාව නිසා තෙල් මිල වැඩි බව පැවසුවත් තෙල් මිල අඩු කර රට වට්ටවන්න බැරි බව අද වනවිට තෙල් සංස්ථාවේ සභාපතිවරයා පවසන බවත් මෙය ජනතා විමුක්ති පෙරමුණේ දිව දෙකේ දේශපාලනය බවත් සජිත් ප්‍රේමදාස මහතා පැවසීය.

වැට්, සෘජු හා වක්‍ර බදු අඩු කරන බව පැවසුවත් අයි එම් එෆ් සමග සාකච්ඡා වට දෙකක් තිබුනත් ප්‍රතිඵල කිසිත් නොමැති බවත් වත්මන් ජනාධිපතිවරයා අයි එම් එෆ් එකේ හිරකරුවකු බවට පත්ව ඇති බවත් සජිත් ප්‍රේමදාස මහතා පැවසීය.

පාස්පෝට් පෝලිමට විසදුම් දෙනවා කිව්ව රජය දැන් කියන්නේ අත්‍යාවශ්‍ය නම් පාස්පෝට් ගන්නා බවත් ආන්ඩුවේ වැඩිපිළිවෙල එයින්ම ගම්‍ය වන බවත් ඔහු සඳහන් කළේය.

ජනාධිපතිවරයා පත් කිරීමට රටින් ආව අයත් අද පාස්පෝට් පෝලිමේ බවත් මේ රජයට රට මුහුණ දෙන ගැටලු වලට විසදුම් දෙන්න බැරි බවත් සජිත් ප්‍රේමදාස මහතා තවදුරටත් පැවසීය.

මෙම අවස්ථාව සඳහා හිටපු පාර්ලිමේන්තු මන්ත්‍රී මුජිබර් රහුමාන් මහතා ඇතුලු පිරිසක් එක්ව සිටියහ.