(යොහාන් භාසුර)

ශ්‍රී ලංකා රේගු බහලුම් පරීක්‍ක්‍ෂණ අංගන තුළ තදබදයක් නිර්මාණය වී ඇති බවත් පසුගිය සතියේ පැවැති දින පහක දීර්ඝ නිවාඩුව එයට හේතු වී ඇති බවත් රේගු මාධ්‍ය ප්‍රකාශක ජ්‍යෙෂ්ඨ රේගු අධ්‍යක්ෂ සුදත් සිල්වා මහතා අද (7) පැවසීය.

සාමාන්‍යයෙන් දිනකට ආනයකින බහලුම් දහසක් පමණ ලැබෙන බව කී සුදත් සිල්වා මහතා පසුගිය දින 5 ක දීර්ඝ නිවාඩුවෙන් පසුව ජූලි 4 වැනි දින බහලුම් 1,289 ක් සහ ජූලි 5 වැනි දින බහලුම් 1,498 ක් ලැබී තිබුණු බව ද සඳහන් කළේය.

එම බහලුම් පරීක්‍ෂණ අංගන වෙත ගෙන ඒම අද ආරම්භ කළත් බහලුම් අංගනවල ධාරිතාව ඉක්මවා ඇති බවත් ශ්‍රී ලංකා රේගුවේ අවදානම් කළමනාකරණ කමිටු රැස්ව බහලුම් පරීක්‍ෂා කිරීම කඩිනම් කිරීම නිසා තදබදය හෙට වන විට අවස්න වනු ඇති බවට විශ්වාස කරන බවත් රේගු මාධ්‍ය ප්‍රකාශක ජ්‍යෙෂ්ඨ රේගු අධ්‍යක්ෂ සුදත් සිල්වා මහතා වැඩි දුරටත් කීය.