(සුජිත් හේවාජුලිගේ )

මැති ඇමැතිවරුන්ගේ පවුල්වල සමීපතම ඥාතීන්ට පාර්ලිමේන්තුව දැක බලා ගැනීම සඳහා ලබාදී තිබූ අවසරය තාවකාලිකව අත්හිටුවා ඇත.

රටේ පවතින තත්වය සැලකිල්ලට ගෙන මෙම පියවර ගත් බව පාර්ලිමේන්තුවේ උසස් නිලධාරියෙක් ඉරිදා ලංකාදීපයට පැවැසීය.

පසුගිය මාර්තු මස 24 වැනිදා පැවති  පාර්ලිමේන්තු කටයුතු පිළිබඳ කාරක සභා රැස්වීමේදී ගත් තීරණයක් අනුව දෙනු ලැබූ  එම අවසරය ක්‍රියාත්මක කිරීමට නියමිතව තිබුණේ පසුගිය අප්‍රේල් මස පළමු වැනිදා සිටය.

මැති ඇමැතිවරුන්ගේ  ළඟම ඥාතින් පාර්ලිමේන්තුව දැකබලාගැනීමට එසේ පැමිණ සිටින අවස්ථාවේදී  එහි අමුත්තන්ගේ  භෝජනාගාරයෙන් ආහාරපාන සපයා දෙන ලෙසටද වේත්‍රධාරිවරයා චක්‍රලේඛයකින් මෙයට පෙර දැනුම්දී තිබිණ.

මැති ඇමැතිවරුන්ගේ ඥාතීන්ට  පාර්ලිමේන්තුව දැකබලාගැනීමට ඉදිරියේදී අවසර ලබාදුන්නත්  පවතින තත්වය අනුව ආහාරපාන සපයාදීමට නොහැකි තත්වයක් පවතින බව  පාර්ලිමේන්තු ප්‍රධානීහු පවසති.මේ අතර පාර්ලිමේන්තුවේ මහජන ගැලරි විවෘත කිරීමද රටේ පවතින තත්වය සැලකිල්ලට ගෙන කල් දමා ඇතැයි  වාර්තා වේ.

පාර්ලිමේන්තුවේ මහජන ගැලරි  මෙයට පෙර විවෘත කිරීමට  සියලු  කටයුතු  සූදානම් කර තිබිණ.පාර්ලිමේන්තුවේ මහජන ගැලරි  වසා දැමුණේ  කොවිඩ්  රැල්ල වේගවත් වීමත් සමගය.