( තිළිණි ද සිල්වා සහ රංජන් කටුගම්පොළ )
 
 
දැනට බූස්ස බන්ධනාගාරයේ රඳවා සිටින තමා ගේ ජීවිත ආරක්ෂාව තහවුරු කිරීමට බන්ධනාගාර නිලධාරීන්ට නියෝග කරන්නැයි  ඉල්ලා සංවිධානාත්මක අපරාධ කල්ලි සාමාජිකයෙකු වන ජනිත් මධුශංක හෙවත් ‘පොඩි ලැසී‘ නැමැත්තා  ගොනු කළ රිට් පෙත්සම සම්බන්ධයෙන් කරුණු දැක්වීමට බූස්ස බන්ධනාගාර අධිකාරීවරයා, එහි ප්‍රධාන ජේල්ර් ,  බන්ධනාගාර කොමසාරිස් ජනරාල්වරයා, වැඩබලන පොලිස්පතිවරයා ඇතුළු පිරිසකට නොවැම්බර් 10 වැනිදා  අධිකරණය හමුවේ පෙනී සිටින්නැයි අභියාචනාධිකරණය අද (23) නොතිසි නිකුත් කළේය.
 
සංවිධානාත්මක අපරාධ කල්ලි සාමාජිකයෙකු වන ජනිත් මධුශංක හෙවත් ‘පොඩි ලැසී‘ නැමැත්තා සිය නීතීඥවරයා මාර්ගයෙන් ගොනු කළ මෙම පෙත්සම ඊයේ අභියාචනාධිකරණය හමුවේ කැදවූ අතර එහිදී මෙම නොතිසි නිකුත් කෙරිණී.
 
අභියාචනාධිකරණයේ සභාපති විනිසුරු ඒ.එච්.එම්.ඩී නවාස් සහ සෝභිත රාජකරුණා යන මහත්වරුන්ගෙන් සමන්විත විනිසුරු මඩුල්ල හමුවේ පෙත්සම කැදවිණී.
 
‘පොඩි ලැසී‘ නැමැත්තා සිය ගොනු කළ මෙම පෙත්සමේ වගඋත්තරකරුවන් වශයෙන් බූස්ස බන්ධනාගාර අධිකාරීවරයා , ප්‍රධාන ජේලර් , බන්ධනාගාර කොමසාරිස් ජනරාල්වරයා සහ වැඩබලන පොලිස්පතිවරයා නම් කරනු ලැබ සිටිති.
 
ගොනු කල පෙත්සමේ වැඩිදුරටත් මෙසේද සදහන් වේ.පෙත්සම්කරු අපරාධ සිද්ධීන් කිහිපයක් සම්බන්ධයෙන් අත්අඩංගුවට ගෙන , මේ වන විට බූස්ස බන්ධනාගාරයේ රඳවා සිටී.
 
බන්ධනාගාරය තුළදී පෙත්සම්කරුට දැඩි ජීවිත තර්ජන එල්ලවී ඇත. බන්ධනාගාර ගතව සිටින පුද්ගලයෙකුගේ ජීවිත ආරක්ෂාව සහතික කිරීමට බන්ධනාගාර බලධාරීන් බැඳී සිටිති.ඒ අනුව බන්ධනාගාරගතව සිටින තමන්ගේ ජීවිත ආරක්ෂාව තහවුරු කිරීමට බන්ධනාගාර පාලනාධිකාරිය බැඳී සිටි.
 
එබැවින් තර්ජන මධ්‍යයේ බන්ධනාගාරයේ සිටින තමන් ගේ ජීවිත ආරක්ෂාව තහවුරු කිරීමට පියවර ගන්නා ලෙස වගඋත්තරකාර බන්ධනාගාර බලධාරීන්ට නියෝග කරන රිට් ආඥාවක් නිකුත් කරන්නැයි පෙත්සම්කරු අභියාචනාධිකරණයෙන් ඉල්ලා සිටී.
 
පෙත්සම්කරු වෙනුවෙන් ජනාධිපති නීතීඥ සාලිය පීරිස් මහතා පෙනී සිටියේය.