(රොමේෂ් මධුෂංඛ)

යුද හමුදාවේ පෙරියකාඩු නිරෝධායන මධ්‍යස්ථානයේදී  නිරෝධායන ක්‍රියාවලිය අවසන් කළ පුද්ගලයින් 16 දෙනෙකු අද (03) පෙරවරුවේ සිය නිවෙස් බලා පිටත්ව ගිය බව යුද හමුදාව පවසයි.

පෙරියකාඩු නිරෝධායන මධ්‍යස්ථානයෙන් පිටව ගිය අවසන් කණ්ඩායමද මෙය බව යුද හමුදාව සඳහන් කළේය.

යුද හමුදාව හා ගුවන් හමුදාව වන්නි දිස්ත්‍රික්කයේ පිහිට වූ නිරෝධායන මධ්‍යස්ථානයන්හි සිට නිරෝධායනය ක්‍රියාවලිය අවසන් වී පුද්ගලයින් 538 දෙනෙකු මේ වන විට නිවෙස් වෙත පිටව ගොස් තිබේ.

යුද හමුදාවේ අධීක්ෂණය යටතේ  පෙරියකාඩු හා පම්පමඩුව නිරෝධායන මධ්‍යස්ථාන වල නිරෝධායනය අවසන් කළ   පුද්ගලයින් 332 දෙනෙකු ද ගුවන් හමුදාව අධීක්ෂණය යටතේ වන්නි ගුවන් හමුදා කඳවුරේදී පුද්ගලයින් 206 දෙනෙකුද මේ වන විට නිරෝධායන ක්‍රියාවලිය අවසන් කර පිටව ගොස් තිබේ.

වන්නි ආරක්ෂක සේනා ආඥාපති මේජර් ජෙනරල් රෝහිත ධර්මසිරි මහතාගේ අධීක්ෂණය පරිදි යුද හමුදා නිරෝධායන මධ්‍යස්ථානය හා වන්නි ගුවන් හමුදා කඳවුරේ අණදෙන නිලධාරී එයාර් කොමදෝරු ඩී.සී.අයි.වීරසූරිය මහතාගේ අධීක්ෂණයන් පරිදි ගුවන් හමුදා නිරෝධායන මධ්‍යස්ථානයන් දිනක් දෙකක් වැනි කාලයක් තුලදී පිහිටුවා නිරෝධායනය කිරීමේ ක්‍රියාවලිය සිදුකරනු ලැබීය.