(ශ්‍රීනාත් ප්‍රසන්න ජයසූරිය)

කටුගස්තොට දේවාලයක පවත්වාගෙන යන නිවසකට කඩා වැදුණු පුද්ගලයන් දෙදෙනකු දේව බලයෙන් ශාන්ති කර්ම සිදු කරන්නේ යැයි කියන කාන්තාවක ගේ කට සහ ගෙල ප්‍රදේශය පිහියකින් කපා තුවාල කර දේපොළ පැහැරගෙන පලා ගොස් ඇතැයි කටුගස්තොට පොලීසිය සඳහන් කරයි.

ශාන්ති කර්ම සිදුකරන බව කියන කාන්තාවගේ හැට හතර හැවිරිදි සැමියාටද මෙම කොල්ලකරුවන් පහරදීම නිසා ඔහුද තුවාල ලබා ඇති අතර අඹුසැමි යුවළ මහනුවර ජාතික රෝහලට ඇතුළත් කර ප්‍රතිකාර ලබමින් පසු වෙති.

ශාන්ති කර්මයක් සිදුකර ගැනීමට අවශ්‍ය බව කියා පැමිණි මෙම පුද්ගලයින් දෙදෙනා අඹු සැමි යුවළ මරා දමන බවට තර්ජනය කර ඔවුන් දෙදෙනාටම පහරදී ශාන්ති කර්ම කරන කාන්තාවගේ ගෙල සහ කට ප්‍රදේශය පිහියකින් කපා තුවාල සිදුකර දෙදෙනාම සාලයේ බිම දිගා කර තිබෙන බව පොලිසිය කියයි.

පසුව මෙම පුද්ගලයන් දෙදෙනා කාන්තාව පැළඳ සිටි රන් කරාඹු ජෝඩුව ගලවාගෙන නිවසේ තිබූ ජංගම දුරකථන හතරක් සහ ටැබ් යන්ත්‍රයක් ඇතුළු දේපොළ කොල්ල කාගෙන පලා ගොස් ඇතැයි කටුගස්තොට පොලිසියේ නිලධාරියෙක් ලංකාදීපයට පැවසීය.

මේවාට අමතරව රුපියල් 73 ,000ක මුදලක්ද පැහැර ගෙන ඇතැයි පොලීසිය කියයි.

පැහැරගත් මුළු දේපොළ වල වටිනාකම රුපියල් 409,000 වන බව ලැබී ඇති පැමිණිල්ලේ සඳහන් වන බව කියති.