(සුජිත් හේවාජුලිගේ)

සංචරණ සීමා ක්‍රියාත්මකවූ පසුගිය 7 සහ 8 යන දෙදිනේදී අධිවේගී මාර්ගවල වාහන ලක්ෂයකට ආසන්න සංඛ්‍යාවක් ධාවනය වී ඇතැයි මාර්ග සංවර්ධන අධිකාරිය පවසයි.

අධිවේගී මාර්ගවල පසුගියදා 7 වැනිදා වාහන පනස් එක් දහස් හත්සිය අනූවක්ද පසුගිය 8 වැනිදා වාහන හතළිස් හත් දහසක්ද මෙසේ ධාවනය වී ඇත.

මෙම දින දෙකේදී රථවාහන ධාවනයෙන් උපයාගෙන ඇති මුදල රුපියල් දෙකෝටි පනස් ලක්ෂයකට අධිකය.

මේ සම්බන්ධයෙන් අප අධිවේගී මාර්ග මෙහෙයුම් ,නඩත්තු හා කළමනාකරණ අංශයේ වැඩබලන අධ්‍යක්ෂ ඉංජිනේරු නිහාල් ලොඩ්වික් මහතාගෙන් කළ විමසුමකදී ඔහු පැවසූවේ අධිවේගී මාර්ගවල රථ වාහන ධාවනය පොදුවේ සියයට 60කින් පමණ අඩුවී ඇති බවය.

අධිවේගී මාර්ගවලින් සංචරණ සීමා නැති වෙනත් සාමාන්‍ය දිනයකදී උපයන ආදායම දළ වශයෙන් රුපියල් දෙකෝටි පනස් ලක්ෂයකට ආසන්න යැයිද මේදිනවල එම ආදායම හරි අඩකින් පමණ අඩු වී ඇතැයි ද ඔහු සඳහන් කළේය .

අධිවේගී මාර්ගවල මේ දිනවල ගමන් ගන්නා වාහන ප්‍රමාණයට අත්‍යවශ්‍ය සේවා සඳහා යන වාහන සහ ගිලන්රථද ඇතුළත් වන බව මාර්ග සංවර්ධන අධිකාරියේ නිලධාරීහු පවසති .