(ශ්‍රීනාත් ප්‍රසන්න ජයසූරිය)

මාවතගම නගරයේ  ගොඩනැගිල්ලක කාමරයක් තුළදී අවුරුදු 19ක් වයස තරුණියක අරක්කු පොවා වෙරි වූ පසු දූෂණය කළේ යැයි කියන විලාසිතා නිර්මාණ ශිල්පියකු මාවතගම පොලිසියේ නිලධාරීන් කණ්ඩායමක්  සැකපිට අත්අඩංගුවට ගනු ලැබ ඇත.

අත්අඩංගුවට ගත් සැකකරු මාවතගම ප්‍රදේශයේ පදිංචි අවුරුදු 40ක් වයස දෙදරුපියෙකි.

දූෂණයට ලක් වූයේ යැයි කියන මෙම 19 හැවිරිදි තරුණිය සැකකරුගේ ඥාති සහෝදරියක් බව මාවතගම පොලිසියේ නිලධාරියෙක් ලංකාදීපයට පැවසීය.

මෙම තරුණිය ද සිය ඥාතියා ගෙන් විලාසිතා නිර්මාණය පිළිබඳව හැදෑරීම සඳහා මෙම උපකාරක පන්තියට සහභාගී වෙන බව පොලිසිය කියයි.

උපකාරක පන්තිය  අවසන් වීමෙන් පසු ඇය උපකාරක පන්තියට පැමිණ සිටි තවත් තරුණියක් සමග පන්තියෙන් පිටව යෑමට ගිය අවස්ථාවේ වර්ෂාවක් ඇද හැලී ඇත. 

ඒ අවස්ථාවේ මඳක් පන්තියේ ම රැඳිසිටි මෙම තරුණියන් දෙදෙනාට මොනවා හරි බොමු යැයි  කියා සැකකරු බීම බෝතලයක් බව හඟවා ඉස්තරම්ම වර්ගයේ අරක්කු බෝතලයක් රැගෙන තරුණියන් දෙදෙනාටම එය පානය කිරීමට ලබාදී ඇතැයි එම පොලිස් නිලධාරියා කීය.

හිස් බීම බෝතලයකට මොහු අරක්කු දමා තිබී ඇත.

තරුණියන් දෙදෙනාම අරක්කු බව නොදැන ඒවා පානය කර ඇති පොලිස් පරීක්ෂණවලින් හෙළි වී තිබේ.

එක් වීදුරුවක් පමණක් පානය කිරීමෙන් පසු එක් තරුණියක පිටවී ගිය අතර සැකකරු සිය ඥාති තරුණියට තමා සමඟ නිවසට යෑමට යෝජනා කර ඇති අතර ඒ ගැන කිසිදු සැකයක් ඇති නොකරගෙන ඔහුත් සමග යාමට නතර වී ඇතැයි කියති.

සැකකරු ද මෙම අරක්කු පානය කර ඇතැයි පොලිසිය කියයි

මෙම 19 හැවිරිදි තරුණිය බීම යැයි සිතා එම අරක්කු වැඩිපුර පානය කිරීම නිසා වෙරි වීමෙන් පසු ඇය දූෂණය කර තිබෙන බව පරීක්ෂණවලින් හෙළි වී ඇතැයි එම පොලිස් නිලධාරියා වැඩිදුරටත් කීය.

ගොඩනැගිල්ලේ සී.සී.ටී.වී .කැමරා සවිකිරීමට පැමිණ සිටි කිහිප දෙනකුට පන්ති කාමරය තුළින් ඩෙස් බංකු පෙරලන ශබ්දයක් ඇසී විපරම් කරන අවස්ථාවේ සිද්ධිය දැක නිරුවතින් සිටි තරුණිය බේරා ගැනීමට ඔවුන් උත්සහ කර ඇතත් සැකකරු තරුණියව මුදා නොහැර ඇයව බලහත්කාරයෙන් රඳවා තබාගෙන සිට ඇතැයි ද පොලිසිය සඳහන් කරයි.

තරුණිය මරා දමනු ඇතැයි ඇතිවූ සැකයක් මත එම අය විසින් ඔහුට පොල්ලකින් පහරදී බලවත් පරිශ්‍රමයක් යොදා තරුණිය මුදා ගෙන ඇතැයි පොලිසිය පවසයි.