(විමුක්ති එස් රුද්‍රිගු)

ජාත්‍යන්තර මූල්‍ය අරමුදල මෙරටට ලබාදී ඇති ආධාර වැඩසටහනේ තෙවැනි සමාලෝචනය සිදුකරනු ලබන කාල සීමාව සම්බන්ධයෙන් ජනාධිපතිවරණයෙන් පසුව ශ්‍රී ලංකාව සමග සාකච්ඡා කිරීමට ජාත්‍යන්තර මූල්‍ය අරමුදල බලාපොරොත්තු වන බවත් මෙරට ඇතිවූ ආර්ථික අර්බුදයෙන් ගොඩ ඒමට ගත් උත්සාහයේ විශාල ප්‍රගතියක් මේ වනවිට ශ්‍රී ලංකාව ලබා ඇතත් තවමත් අවදානම් කාලපයෙන් බැහැර වී නැති බවත් එම අරමුදලේ සන්නිවේදන දෙපාර්තමේන්තුවේ අධ්‍යක්ෂිකා ජුලී කොසැක් මහත්මිය ප්‍රකාශ කළාය.

ජනාධිපතිවරණයෙන් පසුව නව රජයක් සමග හෝ ශ්‍රී ලාංකික ජනතාවගේ තීරණය අනුව ලැබෙන ජනාධිපතිවරණයේ අවසන් ප්‍රතිඵලය මත මෙරටට ලබා දී ඇත ආධාර වැඩසටහන ඉදිරියට ගෙන යාම සඳහා ශ්‍රී ලංකා බලධාරීන් සමග සාකච්ඡා කිරීමට ජාත්‍යන්තර මූල්‍ය අරමුදල සූදානම් බව කොසැක් මහත්මිය පැවැසුවාය.

කෙසේ නමුත් ශ්‍රී ලාංකිකයන්ගේ අනාගතය පිළිබඳ තීරණය කිරීමේ අයිතිය තිබෙන්නේ ශ්‍රී ලාංකිකයන්ට බවත් මෙරට ඇතිවූ ආර්ථික අර්බුදයෙන් ගොඩ එමින් අවදානම් කලාපයෙන් සම්පූර්ණයෙන් බැහැර වීම සඳහා ජාත්‍යන්තර මූල්‍ය අරමුදල මෙරටට ලබාදී ඇති ආධාර වැඩසටහනේ ඉලක්ක සපුරා ගැනීමට ශ්‍රී ලංකාව ප්‍රමුඛතාව ලබාදිය යුතු බවත් එම මහත්මිය ප්‍රකාශ කළාය.

ආධාර වැඩසටහනේ ඉලක්ක සපුරා ගනිමින් නිල සංචිත වැඩි කරගැනීමටත්, උද්ධමනය පහළ දමා ගැනීමටත්, හැකියාව ඇතත් ශ්‍රී ලංකාව තවමත් අවදානම් කලාපයෙන් බැහැර වී නැති බවත් ක්‍රියාත්මක කළ ප්‍රතිසංස්කරණ ඵල දැරීමටත් ආරම්භ වී ඇති බැවින් ලබාගත් ප්‍රගතිය ආරක්ෂා කරගැනීම ඉතා වැදගත් බවත් කොසැක් මහත්මිය පැවැසුවාය.

මෙරට ණය ප්‍රතිව්‍යුහගත කිරීමේ ක්‍රියාවලියට ජාත්‍යන්තර මූල්‍ය අරමුදල සම්බන්ධ නොවන බවත් මෙරට ණය තිරසරභාවය පිළිබඳ අවසන් ඇස්තමේන්තුව පමණක් ජාත්‍යන්තර මූල්‍ය අරමුදල සිදුකරනු ලබන බවත් කොසැක් මහත්මිය සඳහන් කළාය.

ජාත්‍යන්තර මූල්‍ය අරමුදලේ සන්නිවේදන දෙපාර්තමේන්තුවේ අධ්‍යක්ෂිකා ජුලී කොසැක් මහත්මිය ඉකුත්දා පැවැති මාධ්‍ය හමුවකදී මාධ්‍යවේදියකු නැගූ ප්‍රශ්නයකට පිළිතුරු දෙමින් මෙම අදහස් ප්‍රකාශ කළාය.